Tusaýkeser básekesinde Italııanyń myqty oıynshysy, álemniń burynǵy 18-raketkasy Andreas Seppıge san soqtyryp, jergilikti jankúıerlerdi qýantqan jerlesimiz keshe Ilıa Ivashkomen kezdesti. 27 jastaǵy Belarýs eliniń ókili bul kúnderi ATR reıtınginde 52-orynda tur. Bıyl ol Ýımbldonnyń tórtinshi kezeńine deıin jetse, AQSh-tyń ashyq birinshiliginniń úshinshi aınalymynda óner kórsetti. Bul kezdesýde Ivanshkonyń sheberlik deńgeıi Skatovtan bir bas joǵary ekeni anyq baıqaldy. Báseke 6:2, 6:3 esebimen belarýssııalyq tennısshiniń paıdasynan sheshildi. Osylaısha, ol Astana Open dodasyna qatysýshylar arasyndaǵy alǵashqy bolyp shırek fınalǵa joldama aldy.
Dmıtrıı Popko men aýstralııalyq Djon Mıllmanmen arasyndaǵy básekede otandasymyz osaldyq tanytty – 6:3, 1:6, 4:6. Keshke keshkisin Mıhaıl Kýkýshkın jasyl qurlyqtyń taǵy bir ókili Djeıms Dakvordpen kúsh synasty. Búgin Aleksandr Býblık serbııalyq Mıomır Kesmanovıchpen saıysqa túsedi. Endi osy qos jerlesimizden jeńis kútemiz. Kýkýshkın de, Býblık te ATR dodalary men «Úlken dýylǵa» sanatyndaǵy týrnırlerge úzdiksiz qatysyp kele jatqan saqa sportshylar.
Esterińizge sala keteıik, Astana Open týrnıri 26-qyrkúıekke deıin jalǵasady. Álemdik korttarda biraz bedel jıǵan oıynshylardyń basyn qosyp otyrǵan aıtýly jarystyń júlde qory bıylyǵy jyly 480 000 AQSh dollaryn qurap otyr.
Nur-Sultandaǵy týrnırden bólek, taǵy birneshe jerlesimiz túrli básekelerde baq synasýda. Atap aıtsaq, Chehııanyń Ostrava qalasyndaǵy WTA dodasynyń tusaýkeser kezdesýinde Elena Rybakına reseılik Veronka Kýdermetovany 6:1, 6:3 esebimen qapy qaldyrdy. Iýlııa Pýtınseva asa shıelensti ótken oıynda qytaılyq Chjan Shýaıǵa shań qaptyrdy – 5:7, 7:6, 6:4. Bul báseke 3 saǵat 24 mınýtqa sozyldy. Ekinshi kezeńde Rybakına polshalyq Magda Lınetpen jolyqsa, Pýtınseva da aıtýly memlekettiń ókili Iga Sventekpen saıysqa túsedi.
