«Jyl ótken saıyn jasóspirimderdiń mundaı zańsyz qylyǵy azaıyp keledi. Qazir shamamen jylyna 1-2 balanyń osyndaı orynsyz ázili men oısyz is-áreketi anyqtalyp jatady. Munyń barlyǵy ishki ister organdary qyzmetkerleriniń jetkinshekter arasynda belsendi júrgizip kele jatqan túsindirý jumystarynyń nátıjesi dep bilemin», dedi ol.
Terrorızm aktisi týraly kópe-kórineý jalǵan habarlama taratýdyń qoǵamdyq tártipke teris áser etetin qaýipti qylmys ekenin erekshe atap ótken spıker bul zańsyzdyqty keı adamdardyń bir emes, birneshe ret ádeıi qaıtalaıtynyn da atap ótti. Jalǵan aqparat taratatyn resıdıvıster 2019-2020 jyldary Qaraǵandy oblysynda, 2017-2021 jyldary Qostanaı óńirinde anyqtalǵan. Polısııa polkovnıgi: «Mundaı qylmysqa baratyndardyń kóbiniń densaýlyǵynda psıhıkalyq aýytqýlar bolady. Sol sebepti olarǵa tıisti medısınalyq kómek qajet», dedi.
Taǵy bir aıta keterlik jaıt – osy ýaqytqa deıin tirkelgen barlyq jarylǵysh zattar týraly aqparattardyń birde-biri rastalmaǵan. Al bul dabyl boıynsha iske kirisken polısııa, ulttyq qaýipsizdik organdary, órtke qarsy qyzmet, qutqarýshylar jáne medısınalyq jedel járdem qyzmetkerlerin bosqa áýreleý degen sóz. Osyndaı jalǵan aqparat boıynsha oqıǵa ornyna bir ret barǵannyń ózinde kúsh qurylymdary 300 myń teńgege deıin qarajat jumsaıdy eken. Al jumysy toqtap qalǵan iri kásiporyndar men óndiris oryndary ár saǵat saıyn mıllıondap shyǵynǵa batady.
IIM ókili jalǵan aqparatty kóbine adamdar erikkennen, ázil retinde nemese mas kúıde taratatynyn aıtty. Al ár qońyraýdyń sebebi ártúrli. Mysaly, bireýleri kek alýdy kóksese, endi bireýleri mekemeniń jumysyna kedergi keltirýdi, mekteptegi sabaqty boldyrmaýdy oılaıdy. Quqyq qorǵaý organdarynyń jumysyn «teksermek» bolyp, «jarylǵysh zat qoıyldy» dep jalǵan aqparat taratqandar da bar.
«Kámeletke tolmaǵandar mundaı qylmysqa ne úshin barady? Olar dostarynyń arasynda ózderiniń «batyr» ekenin kórsetkisi keledi, keıde úı tapsyrmasyn oryndamaǵandyqtan, sabaqqa qatyspaý úshin osylaı isteıdi. Statıstıkaǵa súıensek, jalǵan habarlamalar bergeni úshin sottalǵandardyń 55 paıyzy qylmys jasaǵan sátte ýdaı mas bolǵan. О́tken jyly osyǵan uqsas 16 fakt tirkelse, bıyl 14 oqıǵa anyqtalyp otyr», dedi D. Razýev.
«Jalǵan aqparattardyń 85 paıyzǵa jýyǵy mobıldi telefon arqyly habarlanǵan. Al ınternet arqyly kelip túsken faktiler 8 paıyz shamasynda. Mundaı qylmystardy ashý kóp ýaqytty talap etkenimen, kináliler jazasyz qalmaıdy», degen IIM qyzmetkeri qońyraý shalǵan adam daýsyn ózgertse de, sım-kartasy men telefonyn aýystyrsa da báribir tabylatynyn jetkizdi. Dál osy qylmystyń 90 paıyzdan astamy izi sýymaı, bir táýlik ishinde ashylatynyn málimdegen spıker jyl bastalǵaly beri elimizde jalǵan terrorızmge qatysty 52 qylmystyq is tirkelgenin habarlady. Qazirgi tańda onyń 28-i sotqa joldanyp, 16 adamǵa qatysty úkim shyǵarylǵan.
Elimizde terrorızm aktisi týraly jalǵan habarlama taratqandar 14,5 mln teńge kóleminde aıyppul arqalaıdy nemese bes aı boıy túzeý jumystaryna tartylýy, sondaı-aq 5 jylǵa deıin bas bostandyǵynan aıyrý nemese shekteý jazasy qoldanylýy ábden múmkin.
«Terrorızm aktisi týraly jalǵan habarlama taratý – ázil de, ermek te emes, ol – qylmys», degen polkovnık isterin istep alyp, keıin qansha ókinse de qaskóıdiń qylmystyq jaýapkershilikten qutyla almaıtynyn eskertip ótti.
