Qazaqstan Respýblıkasy Mádenıet jáne sport mınıstrligi jáne Almaty qalasy ákimdiginiń qoldaýymen Qazaqtyń Jambyl atyndaǵy memlekettik fılarmonııasynyń kameralyq zalyna KSRO Halyq ártisi, Halyq qaharmany, QR Memlekettik syılyqtyń ıegeri, dırıjer, kúıshi-kompozıtor Nurǵısa Atabaıuly Tilendıevtiń esimi berilip, memorıaldyq taqtasy ashyldy.
Saltanatty sharaǵa qatysýshylar aldynda Mádenıet jáne sport mınıstrligi Mádenıet komıtetiniń tóraǵasy Aqan Ábdýáli, Qazaqstannyń eńbek sińirgen ártisi Darıǵa Tilendikelini, «Otyrar sazy» orkestriniń kórkemdik jetekshisi jáne bas dırıjeri Din-Zýhra Tilendıeva, UǴA akademıgi Orazaly Sábden sóz sóılep, qazaq mádenıetindegi aıtýly oqıǵaǵa oraı kompozıtor týraly jyly estelikterimen bólisti.
Komıtet tóraǵasy Aqan Jylqyshybaıuly Mádenıet jáne sport mınıstri Aqtoty Raıymqulovanyń quttyqtaý sózin oqyp berdi. «85 jyldyq tarıhy bar Jambyl atyndaǵy Memlekettik fılarmonııasynyń kameralyq zalyna KSRO halyq ártisi, Halyq qaharmany Nurǵısa Atabaıuly Tilendıevtiń esimin berý – qazaq mýzyka ónerine óshpes iz qaldyraǵan talantty tulǵalarymyzdy esimin ulyqtap, rýhyna taǵzym etý hám qazaqtyń mýzykalyq óneri men mádenıetiniń mereıli merekesi dep esepteımin. Nuraǵańnyń ónegeli ómiri men óneri, ǵajaıyp týyndylary halqymyzdyń ıgiligine máńgilik qyzmet eteri sózsiz» deıdi A.Rahmetollaqyzy quttyqtaý hatynda.
Ashylýyn kópten kútken jańa kameralyq zalda kompozıtordyń jeke tutynǵan zattary, fotosýretterinen mazmundy kórme uıymdastyrylyp, kesh qonaqtaryna N.Tilendıevtiń mýzeıiniń qymbat jádigerlerin tamashalaý múmkindigi týdy. Al keshkisin akademııalyq folklorlyq-etnografııalyq «Otyrar sazy» orkestri men B.Baıqadamov atyndaǵy memlekettik hor kapellasynyń qatysýymen eske alý konsertiniń shymyldyǵy túrildi. Saltanatty kesh «Ata tolǵaýy» kúıimen ashylyp, Jalǵasbek Begendikov pen Músilim Ámze dırıjerlik jasap, Qazaqstannyń eńbek sińirgen qaıratkerleri Dına Hamzına, Nurjan Jampeıisov, Gúlzııa Stambek, Meırambek Besbaevtyń, halyqaralyq baıqaýlardyń laýreattary Ámire, Farhad Kýbıev, Taıyr Tájiǵulov, Danııar Baıjumanov, Ásem Áýbákirova, Elmıra Qashqymbaeva sekildi belgili ártister kompozıtordyń shyǵarmalaryn oryndady.
ALMATY
