«Nur-Sultan qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen Aına Bákeeva usaq buzaqylyq jasaǵany úshin kináli dep tanylyp (QR ÁQBtK-niń 434-babynyń 1-bóligi), 10 táýlik merzimge qamaýǵa alý túrinde ákimshilik jazaǵa tartyldy», dep jazady Nur-Sultan sotynyń baspasóz qyzmeti.
Qaýly zańdy kúshine engen joq.
Eske sala ketsek, Qaznette elordalyq №58 mektepte balalarǵa jasyryn túrde dárethanada ekpe jasalyp jatqany týraly jalǵan habarlama taraǵan bolatyn. Bilim basqarmasy bul jalǵan aqparat ekenin naqtylady.
Sonymen qatar, Aına Bákeeva jáne taǵy birneshe adam elordalyq mektepke kirip, barlyq sanıtarlyq-epıdemıologııalyq normalardy buzyp, dárethanada ekpe salý faktisin dáleldeýge tyrysqan. Bul týraly beıne áleýmettik jelilerde jarııalanǵan.
