Bıyl ekinshi márte ótkizilip jatqan halyqaralyq dodany Mádenıet jáne sport mınıstrligi, Ulttyq Olımpıada komıteti men Nur-Sultan qalasy ákimdiginiń qoldaýymen «Denıs Ten qory» qoǵamdyq qory uıymdastyrdy. 2019 jyly tuńǵysh ret Denıs Ten týyp-ósken Almaty qalasynda tusaýy kesilgen baıraqty báseke bıyl birinshi márte elordada ótti. Sebebi osy týrnır ótýi kerek bolǵan Almatydaǵy «Halyq Arena» sport kesheni qazirgi tańda koronavırýspen aýyrǵan naýqastardy emdeý ortalyǵyna aınalǵan. Sondyqtan uıymdastyrýshylar jarystyń ótý ornyn aýystyrýǵa májbúr boldy. Al byltyrǵy týrnır koronavırýs pandemııasyna baılanysty ótpeı qalǵan edi.
Osy jyldan bastap mánerlep syrǵanaýdan «Chellendjer» (ISU Challenger Series) sanatyndaǵy jyldyń 7-shi jarys kezeńine qosylǵan bıylǵy Denis Ten Memorial Challenge týrnırinde 16 elden kelgen 100-den astam sportshy baq synady. Olardyń qatarynda bıylǵy álem chempıonatynyń júldegerleri, Beıjińde ótetin Qysqy Olımpııa oıyndaryna joldama jeńip alǵan birqatar tájirıbeli mánerlep syrǵanaýshylar da bar.
Al qazaqstandyq sportshylardan bul synda el namysyn erler arasynda Rahat Bralın, Mıhaıl Shaıdorov, Dıas Jırenbaev, qyzdar básekesinde Anastasııa Lobanova, Bogdana Rakısheva, Iаsmına Tekık jáne juptasyp óner kórsetýde Gaýhar Naýryzova/Boıansangýr Datıev pen Maksın Ýezerbı/Temirlan Erjanov juby qorǵady.
Denis Ten Memorial týrnıri jas mánerlep syrǵanaýshylarǵa óz baqtaryn halyqaralyq arenalarda synap kórýge múmkindik beretin jarys sanalady. Máselen, 2019 jyly qazaqstandyq Maksın Ýezerbı men Temirlan Erjanov juby Almatyda ótken halyqaralyq jarysta qola medalǵa ıe bolyp, 2020 jylǵy álem chempıonatyna joldama alǵan edi.
Bıylǵy básekege toqtalar bolsaq, erler arasyndaǵy synda júldeli úsh oryndy da Reseı sportshylary jeńip aldy. Atap aıtqanda, Petr Gýmennık bas júldeni ıelense, kúmis pen qola medal Mark Kondratıýk pen Andreı Mozalevke buıyrdy. Al 2019 jylǵy Qazaqstan chempıony jáne Gdanskide (Polsha) ótken jasóspirimder arasyndaǵy Gran-prı kezeńiniń júldegeri atanǵan Mıhaıl Shaıdarov bul joly úzdikter qatarynan kórine almaı, jarysty nebári toǵyzynshy orynmen qorytyndylady.
2019 jylǵy memorıalda jasóspirimder sanatynda óner kórsetip, sol kezde 4-shi orynǵa ıe bolǵan Rahat Bralın bıyl 12-shi satyǵa taban tiredi. Al 17 jastaǵy mánerlep syrǵanaýshy Dıas Jırenbaev jarysty 10-orynmen túıindedi.
Qyzdar arasyndaǵy básekede Belarýs ókili Vıktorııa Safonova top jardy. Kúmis jáne qola júldelerdi ázerbaıjandyq Ekaterına Rıabova men ýkraınalyq Anastasııa Shabotova ózara bólisti. Qazaqstandyq Anastasııa Lobanova, Iаsmın Tekık, Bogdana Rakısheva 8-den 10-ǵa deıingi oryndarǵa turaqtady.
Juptyq synda reseılik Anastasııa Skopsova-Kırıll Aleshın jáne Elızaveta Hýdaıberdıeva-Egor Bazın altyn jáne qola júldeni jeńip alsa, ýkraınalyq Aleksandra Nazarova men Maksım Nıkıtın juby 2-oryndy ıelendi. Otandyq mánerlep syrǵanaýshylar Gaýhar Naýryzova men Boısangýr Datıev úzdik jeti sportshynyń qatarynan kórindi.
