Osy oraıda Mańǵystaý oblysy boıynsha qylmystyq-atqarý júıesine qarasty mekemelerde jazasyn óteýshilerdiń ómirge degen qulshynysyn arttyrý maqsatynda túrli is-sharalar, eńbekke tartý jumystary turaqty júrgizilip keledi.
Buǵan Mańǵystaý oblysy boıynsha qylmystyq-atqarý júıesine qarasty GM-172/8 qaýipsizdigi barynsha tómen mekemesinde jazasyn óteýshilerdiń «Ýnıversal Aktaý» jaýapkershiligi shekteýli seriktestiginde jumys isteýi dálel. Seriktestik 20 sottalǵandy jumyspen qamtyp otyr.
– Jazasyn óteýshiler plastık terezeler jasap ýaqtyly jalaqylaryn alyp, memleket shyǵynyna jáne jábirlenýshige keltirgen shyǵyndaryna jalaqylarynyń 50%-yn tólep keledi. Jazasyn óteýshiler mekeme aýmaǵynda ashylǵan «Ýnıversal Aktaý» jaýapkershiligi shekteýli seriktestigi basshysyna jáne GM-172/8 mekeme ákimshiligine rızashylyǵyn bildiredi. Jalpy mekemede jazasyn óteýshilerge tálim-tárbıe berý, olardyń ómir súrý sapasyn arttyrýǵa baǵyttalǵan jumystar jan-jaqty jáne turaqty júrgizilip keledi, deıdi jasaq bastyǵy, ádilet maıory Erbol Sársenbaev.
Aqtaý – qurylys jumystary qarqyn alǵan qala. Sottalǵan azamattardyń sheber qolynan shyqqan plastık terezeler Aqtaýdyń kórikti úılerine paıdalanylýda. Seriktestik úı qurylysyn salýshy kompanııalarmen ózara kelisim júrgizip, óz ónimderin naryqqa shyǵarady. Jyraqta jazasyn ótep júrse de el damýyna qanatymen sý sepken qarylǵashtaı bolyp óz úlesterin qosqanyna sottalýshylar da rıza.
