Bankter týraly jalǵan aqparat taratqandardyń esimi belgili boldy

Elimiz bankteri týraly jalǵan aqparat taratqandardyń esimi belgili boldy. Bul týraly Almaty qalalyq prokýratýrasynyń baspasóz qyzmeti habarlady. Sońǵy kúnderi jurtshylyqqa uıaly telefon nemese keıbir saıttar arqyly elimiz bankteriniń jabylýy múmkin ekeni týraly aqparat tarady. Munyń aqyry bankterdiń qalypty jumys isteýine kedergi keltirip, kópshiliktiń alańdatýshylyǵyn týǵyzǵan bolatyn. Osyǵan oraı, bankterdiń jaýapty tulǵalary el ishin arańdatqandardyń esimin bilýdi surap, quqyq qorǵaý organdaryna talap-aryz túsirdi. Prokýratýra men ulttyq qaýipsizdik organdarynyń tekserýi nátıjesinde,  «Signum» zań fırmasy» JShS qyzmetkerleri Ábilqaıyr Naqypov, Vıktorııa Trofımovıch pen Áıgerim Adasbaevanyń bank týraly jalǵan aqparat taratýǵa tikeleı qatysy bolǵany anyqtaldy. Olarǵa dáıeksiz habardy buryn «Bank Sentr Kredıt» bankinde qyzmet istegen Darhan Sabdenov aıtqan eken. Onyń osy áreketine baılanysty is qozǵalyp, 20 táýlikke qamaýǵa alý týraly sot sheshimi shyqty. Al Almaty qalasynda ornalasqan «Bank Sentr Kredıt» ózderine kelgen shyǵyndy óndirý jóninde sotqa talap-aryz jazdy. Tekserý barysynda jalǵan aqparat taratqan D. Sabdenovtiń ústinen budan buryn Qylmystyq kodekstiń 251-babynyń 2- bóligine sáıkes, qylmystyq is qozǵalǵany málim boldy. Alaıda, quqyq qorǵaý qyzmetkerleriniń aıtýy boıynsha, bul is zańǵa qaıshy qysqartylǵan. Sondyqtan atalǵan is qosymsha tergeýge jiberildi. Al joǵaryda attary atalǵan qalǵan arańdatýshylarǵa qatysty tergeý amaldary júrgizilýde. Ámirhan Almaǵanbetov. Derekkóz: Almaty qalalyq prokýratýrasy Foto:Telekomza.ru.