Aqtóbe qalalyq sotynda Kúnbol Turymov jáne Vadım Masqa qatysty sot otyrysy ótti. Kúnbol Turymov buǵan deıin Aqtóbe oblystyq qurylys, sáýlet jáne qala qurylysy basqarmasynyń basshysy qyzmetin atqarsa, Vadım Mass Yrǵyz aýdanynda birneshe mektep salýdy óz mindetine aldy.
Kúnbol Turymovqa Qylmystyq kodekstiń «salǵyrttyq», al Vadım Massqa «alaıaqtyq» baby boıynsha aıyp taǵyldy. Istiń materıalyna súıensek, «Nurly jol» baǵdarlamasy aıasynda Yrǵyz aýdanynda 100 oryndy ınternaty bar mektep salý josparlanǵan.
Bilim ordasynyń ózi 300 orynǵa shaqtalǵan. 2017 jyly tender jarııalanyp, quny 1,4 mlrd teńge bolatyn qurylys jumysynyń merdigeri anyqtaldy. Qurylys 13 aıǵa josparlanǵan. Aldymen jumys joba-smeta qujatyna saı júrgizilgenimen, keıin kólik qyzmetiniń baǵasy kóterilgenin, joba-smeta qujatyna ózgertý engizý kerek ekenin aıtyp, sendirgen, osy jolmen aqsha jymqyrýdy josparlap, iske asyrǵan.
Merdiger Yrǵyz aýdanynda eki mektep salyp qoldanysqa berdi, al dene shynyqtyrý-sport kesheniniń qurylys aıaqtalmaı qalǵan. Osy iske qatysty sot úkimi shyqty. Nurbol Turymov aıypty dep tanylyp, 2 jyl 6 aıǵa bas bostandyǵynan shekteý jazasy taǵaıyndaldy. Ol sotta bar kinásin moıyndady. Endi túnde dámhana, meıramhana, klýbqa barýǵa bolmaıdy. Jyl saıyn 100 saǵat qoǵamdyq jumys isteýi tıis. Probasııalyq baqylaý júrgiziledi. Al Vadım Mass Qylmystyq kodekstiń «alaıaqtyq» baby boıynsha aıypty dep tanyldy. Ol 6 jyl 6 aıǵa bas bostandyǵynan aıyryldy. Azamattyq shaǵym ishinara qanaǵattandyryldy.
Vadım Mass Aqtóbe oblystyq qurylys, sáýlet jáne qala qurylysy basqarmasyna 96 632 953 teńgeni qaıtarýy tıis.
Sot úkimi zańdy kúshine engen joq.
