«Tennadaıs Park» stadıonynda ótken kezdesýdiń esebin 28-mınýtta alań qojaıyndary ashty. «Manchester Sıtı» akademııasynyń túlegi Lıýıs Fıoronı komandalasy Stıven Kellıden pas alyp, qazaqstandyq qorǵaýshy Shırobokovty aldap soǵyp, Ýstımenko qorǵaǵan qaqpanyń sol jaq buryshyn dál kózdedi – 1:0. Ekinshi taımnyń basynda Shotlandııa quramasy eseptegi ústemdigin eseledi. Lıýıs Fıoronı sheber pasymen quramasynyń eń tájirıbeli oıynshysy Glenn Mıddltondy qaqpashymen betpe-bet shyǵardy. Nátıjesinde oıynnyń 56-mınýtynda Mıddlton bizdiń qaqpany dál kózdep, tablodaǵy kórsetkishti 2:0-ge jetkizdi.
Matchtyń 71-mınýtynda Elhan Astanovtyń aıyp alańyna asyrǵan pasyn Maksım Samorodov utymdy paıdalanyp, esep aıyrmasyn qysqartty – 2:1. Kezdesýdiń sońyna deıin jerlesterimiz esepti teńestirýge tyrysqanymen, shotlandııalyq fýtbolshylar oǵan múmkindik bermedi. 2:1 esebin match sońyna deıin saqtap qalǵan Shotlandııa quramasy osylaısha irikteý kezeńindegi alǵashqy jeńisine qol jetkizdi. Al Qazaqstan fýtbolshylary qatarynan besinshi oıynda jeńildi.
