«Barystyń» baby kelispeı tur

Jańa úsh oıynshymen tolyqty

Byltyrǵy maýsymnan bastap «Barys» tizginin otandyq maman Iýrıı Mıhaılıs ustaǵany bel­gili. Kezinde hokkeıshi retinde jankúıerlerdiń kóńilinen shyǵa bilgen Iý.Mıhaılıs ázirshe bapker retinde ózin moıyndata alar emes. «Barys» byltyrǵy maýsymdy táýir ótkizgenimen, bıylǵy óneri jankúıerlerdiń kóńilinen shyqpaı tur. Buǵan maýsymaralyq úzilisten keıin klýb sapynan birqatar táji­rıbeli oıynshylardyń basqa komandaǵa aýy­syp ketýi de sebep bolýy ábden múm­kin. О́ıtkeni olardyń orny­na kelgen jańa hokkeıshiler komandaǵa birden sińisip kete almady. Qazannyń basynda «Barys» sha­býylshy Krıs­tıan Tomaspen keli­simshartty buz­ǵanyn habarlady. Ol QHL-da 9 match ótkizip, bir márte ǵana nátıjeli paspen kózge túse aldy.

Iýrıı Mıhaılıs osylaısha ózine qajetsiz oıynshylarmen maýsym ortasynda qoshtasyp, «Barys» sapynda buryn oınap ketken hokkeıshilerdi shaqyra bas­tady. Máselen, birer kún buryn elordaǵa shabýylshylar Anton Sagadeev pen Lınden Veı oraldy. Alǵashqysy jyl basynda Iаroslavldiń «Lokomotıvine» aýysqan bolsa, ekinshisi sońǵy kezderi Sankt-Peterbýrgtiń SKA klý­bynda óner kórsetti. Biraq ekeýi de bıyl óz klýbtarynda jar­qyrap kózge túse almady. Sagadeev búginge deıin 8 ret muzaıdynǵa shyǵyp, áriptesterine bir márte nátıjeli pas asyrǵan. Al 2017-2018 jylǵy maýsymda «Barysty» órge súıregen kanadalyq hokkeıshi sońǵy úsh jyl ishinde aldymen Máskeýdiń, sodan keıin Sankt-Peter­býrgtiń áskerı komandalarynda oınady. SSKA quramynda júrip ol Gagarın Kýbogynyń ıegeri atansa, bıylǵy maýsymda SKA quramynda 21 matchta muzaı­dynǵa shyǵyp, 11 (5+6) upaı jınady. Eki oıynshy da «Barysta» jyl sońyna deıin óner kórsetedi.

Sonymen qatar halyqaralyq úzilis kezinde elordalyq ujym óz qataryna Slovakııa quramasynyń shabýylshysy Tomash Iýrchony qosty. Slovakııalyq «Koshıse» klýbynyń tárbıelenýshisi ár jyldary QHL jáne Amerıka hokkeı lıgasyndaǵy «Detroıt», «Chıkago» jáne «Edmonton» se­kildi klýbtardyń namysyn qorǵap, biraz tájirıbe jınaqtaǵan. Byl­tyrǵy maýsymda ol «Vegas» pen «Henderson Sılver Naıts» koman­dalarynda oınap, 13 (5+8) upaı jınaǵan. Sondaı-aq ol jýyrda ulttyq quramasymen birge kelesi jyly Beıjińde ótetin Olımpııa oıyndaryna joldama jeńip aldy.

Statıstıka ne deıdi?

«Barystyń» qazan aıyndaǵy oıyndaryn qyrkúıektegi báseke­lermen salystyrar bolsaq, sha­býyl­shylardyń nátıjeliligi tó­men­degenin baıqaımyz. Qyr­kúıekte «Barys» 11 oıynda 27 shaıba soqqan bolsa, qazanda 14 match ótkizip, 33 márte qarsylas koman­danyń qaqpasyn dál kózdegen. Al búginge deıin qazaqstandyq komanda 27 oıynda 65 shaıba soqty (bir oıynda ortasha eseppen 2,4). Osy kórsetkish boıynsha QHL-dyń kóshin «Metallýrg» klýby bastap tur. Magnıtogor komandasynyń enshisinde 90 shaıba bar. Sondaı-aq qaqpasyna eń az shaıba jibergen de dál osy «Metallýrg» bolyp tur – 49. «Barys» bul ýaqyt aralyǵynda óz qapasyna 74 shaıba ótkizip, tómengi orynda tur.

«Barys» qazan aıyndaǵy eń iri jeńisine Vladıvostokta qol jet­kizdi. Iýrıı Mıhaılıstiń komandasy «Admıraldy» 4:1 esebimen jeńdi. Erekshe atap óterligi, bul oıynd­a «Barys» sapynan kózge tús­ken Dinmuhamed Qaıyrjan koman­danyń QHL-da gol soqqan eń jas oıynshysy atandy. 18 jas­taǵy shabýylshy bıyldan bastap «Ba­rystyń» negizgi quramynda oınap júr.

О́tken aıdaǵy eń iri jeńilis 24 qazanda «Barys Arenada» tirkeldi. Bul keshte «Barys» Cherepovestiń «Se­verstal» klýbyna 1:5 esebi­men jol berdi.

Eki aıdyń qorytyndysy bo­ıyn­sha, «Barys» sapynda ázirge Nıkıta Mıhaılısten ozatyn shabýylshy tabylmaı tur. 27 oıynda ol 13 márte mergendigimen kózge túsip, 17 ret áriptesterine nátı­jeli pas asyrǵan. 30 upaı jınaǵan Mıhaılıs tek «Barystyń» emes, QHL-dyń úzdik surmergender tiziminiń úshinshi satysyna jaı­ǵasqan. Onyń aldynda 39 upaıy bar (13+26) «Dınamo» ókili (Más­keý) Vadım Shıpachıov pen «Vı­tıaz» shabýylshysy Nıko Oıamıakı (19+11) tur.

Mıhaılıspen qatar Da­ren Dıs te komandanyń úzdik surmergeni sanalady. Ol 27 matchta qarsylastar qaqpasyna 9 shaıba soǵyp, 10 ret áriptesteriniń kózge túsýine jaǵdaı jasaǵan. Paıdalylyq koeffısıenti jaǵynan Dıs te lıgadaǵy úzdik­terdiń biri. Daren qo­r­ǵaýshy-bom­bardırler arasynda 29 upaımen ekinshi orynǵa ornalasqan. Odan tek Teodor Lennstrıom (Torpedo) ǵana ozyp tur. Ol Dısten 4 upaıǵa artyq jınaǵan.

Aldaǵy qarsylastarymyz kimder?

Bul aıda «Barys» alty oıyn ótkizedi. Úsh oıyn syrt aıdynda, úsh matchty «Barys Arenada». Qarashadaǵy básekeni elordalyq ujym keshe syrt aıdynda «Sochı» klýbymen bastady. Bul – eki ujym arasyndaǵy osy maýsymdaǵy al­ǵashqy oıyn bolmaq. Qazirgi tańda «Sochıdiń» de jaǵdaıy asa máz emes. Olar «Batys» konfe­rensııa­syndaǵy týrnır kestesinde 22 upaımen 11-orynda keledi.

Bul matchtan keıin jerleste­rimiz Máskeýge qonaqqa baryp, jergilikti «Spartakpen» kezdesedi. Qyr­kúıekte «Megasport» mu­zaı­dynynda ótken oıynda «Barys» 1:4 esebimen jeńilip qal­ǵan edi. «Spartak» «Batys» konfe­ren­sııasyndaǵy týrnır kestesinde 30 upaımen 8-satyǵa jaıǵasqan.

Elordalyqtar syrt aıdyndaǵy oıyndar serııasyn Cherepoveste túıindeıdi. 24 qazanda «Barys Arenada» ótken oıynda «Sever­stal­dan» 1:5 nátıjesimen jeńil­gen jerlesterimiz endi «Muz saraıynda» ese qaıtarýdy kózdeıdi.

Sodan keıin qazaqstandyq hokkeıshiler «Barys Arenaǵa» oralyp, «Dınamo Mınsk», «Torpedo» jáne «Vıtıaz» ujymdarymen synǵa túsedi.