Qazaqstan • 02 Jeltoqsan, 2021

Qazaq teleradıosynyń jádigerleri saqtalǵan saıt iske qosyldy

74 ret kórsetildi

Búgin Kazmedia ortalyǵynda «Qazaqstan» teleradıokorporasııasynyń altynqor.com caıty tanystyryldy. Jańa saıtta 1930 jyldardan beri Qazaq televızııasy qorynda saqtalǵan qundy vıdeo jáne aýdıomaterıaldar toptastyrylǵan. Bul týraly korporasııanyń basqarma tóraıymy Lázat Tanysbaı málimdedi, dep habarlaıdy Egemen.kz.

«Bul - altyn qorda uzaq jyldardan beri saqtalǵan murany qyzyǵýshylyq tanytqan árbir janǵa qoljetimdi etý úshin júzege asyrylǵan joba. Saǵynyshqa aınalǵan beıneler men daýystardy, mazmunyn joǵaltpaǵan habarlardy osyndaı jolmen halyqtyń ıgiligine qaıta usynýdy jón kórdik. Saıtty zertteýshi ǵalymdar da ashyq derekkóz retinde paıdalana alady. Búginde qorda 110 myńnan astam beıne jáne aýdıomaterıal bolsa, onyń qatary jyl saıyn 1000 materıalmen tolyqtyrylyp otyrady. Sondyqtan saıtty toltyrý isi turaqty túrde jalǵasyn taýyp otyrady», dedi Lázzat Tanysbaı saıttyń tanystyrylymynda.

Saıtqa jarııalanǵan materıaldar birneshe bólim boıynsha iriktelgen. Mysaly, «Beıneqor» bóliminde S.Áshimbaev, Sh.Murtaza, S.Orazalın júrgizgen «Paryz ben qaryz», «Ult jáne sana», «Suhbat» baǵdarlamalary, «Tamasha», «Halyq qazynasy», «Asyl mura», «Adam izdep júrmin», «Kelesi aıaldama», «Kesh jaryq», «Kúltóbe» syndy 800-den astam bólimnen turatyn 50 telehabar, «Sovettik Qazaqstan» kınojýrnaly men «Qazaqtelefılm» óndiristik birlestiginiń jobalary bar.

Al «Tulǵalar» bóliminde K.Ázirbaev, M.Áýezov, S.Muqanov, Ǵ.Músirepov, Ǵ.Mustafın, Á.Tájibaev, Sh.Jıenqulova, K. Baıseıitova, Sh.Aımanov, Sh.Aıtmatov, Q.Myrza Áli syndy tulǵalardyń qatysýymen ár jyldary túsirilgen beınetoptamalar qamtylǵan.

«Aýdıoqor» bólimine 1954 jyldan bergi saqtalǵan M.Áýezov, S.Muqanov, I.Esenberlın, B.Soqpaqbaev, Ǵ.Músirepov syndy 100 ult qaıratkeriniń ár jyldary jazylyp alynǵan daýystary, Q.Baıjanov, K.Ázirbaev, Q.Babaqov, Á.Qashaýbaev, J.Elebekov, J.Kármenov, M.Eshekeev sııaqty qazaq án óneri maıtalmandarynyń daýysymen jazylǵan 132 án, ár jyldary Qazaqstan tóńireginde júrgizilgen túrli ekspedısııalardaǵy sheshendik óner jaıyndaǵy suhbattar, Batyrlar jyrynyń 50 nusqasy, 100 kúı, 100 ertegi nusqasy, «Syńsý», Besik jyry, «Jar-jar», «Betashar», «Jarapazan», Joqtaý» syndy turmystyq-ǵuryptyq ánder engizildi.

Qosa ketsek, is-shara aıasynda Qazaq radıosynyń 100 jyldyǵyna oraı jaryqqa shyqqan «Altyn qor. Amanat» aýdıojınaǵy tanystyryldy. Antologııa «Dáýir úni», «Atadan qalǵan asyl sóz», «Batyrlar jyry», «Án óneri», «Kúı», «Salt-dástúr» jáne «Ertegi» dep atalatyn 7 bólimnen turady. Aýdıojınaqtyń ereksheligi - usynylǵan týyndylar arnaıy flesh-kardqa jazylǵan. Ár bólimniń sońyndaǵy QR-kod arqyly radıo jáne altynqor.com saıtynan jınaqtyń elektrondy nusqasyn tyńdaýǵa bolady.

Sońǵy jańalyqtar

Tozaq qaqpasy

Rýhanııat • Keshe

Eskilik pen estilik

Ádebıet • Keshe

Polısııa: Kadr hám qadir

Qazaqstan • Keshe

Máńgilik saıahatshylar

О́ner • Keshe

Uqsas jańalyqtar