Úndistan Áskerı-áýe kúshteriniń baspasóz qyzmeti Twitter paraqshasynda apat Kýnoor qalasynyń mańyndaǵy Nılgırıs aýdanynda bolǵanyn jazdy.
«Búgin bortynda general Bıpın Ravat mingen Áskerı-áýe kúshteriniń Mı-17V-5 tikushaǵy Tamılnad shtatyndaǵy Kýnoor mańynda apatqa ushyrady. Apat sebebin anyqtaý úshin tergeý bastaldy», dep jazylǵan habarlamada.
Republicworld.com aqparattyq portaly Bıpın Ravattyń aýrýhanaǵa jetkizilgenin jáne apattan úsh adam aman qalǵanyn habarlady. Ázirge resmı aqparat joq. Jergilikti aqparat quraldarynyń habarlaýynsha, borttaǵy 14 adamnyń arasynda general Ravattyń áıeli, onyń kómekshisi, sondaı-aq jeke kúzettiń arnaıy jasaqtary bolǵan.
Qazirgi sátte apat ornynda qaza tapqan bes adamnyń máıiti tabyldy. Taǵy birneshe adam aýyr kúıik jaraqatymen aýrýhanaǵa jetkizildi. Olardyń aty-jóni jarııalanǵan joq.
