Ulttyq komıssııa tóraıymy Lázzat Ramazanova is-shara qatysýshylaryna arnaǵan alǵy sózin el Táýelsizdiginiń 30 jyldyǵy mereıtoıymen quttyqtaýdan bastady.
«Táýelsizidik jyldary elimizde otbasy ınstıtýtyn nyǵaıtýǵa, áıelderdiń quqyqtary men ekonomıkalyq múmkindikterin keńeıtýge, ana men balany qorǵaýǵa qatysty bastamalar kóterilip, ony damytý qolǵa alynyp keledi. Otbasy qundylyqtaryn saqtap, ony nyǵaıtý elimizdiń damýyna áser eteri sózsiz. О́ıtkeni tek baqytty otbasy eldiń birligi men berekesiniń tiregi bola alatyny aqıqat. Tek birligi jarasyp, berekesi kelisken el ǵana jetistikke jeteri sózsiz», dedi Lázzat Ramazanova óz sózinde.
Otyrys barysynda qaýipsizdik, sot jáne quqyq qorǵaý salalarynda qyzmet etip otyrǵan áıelder jaıly, sondaı-aq olardyń basshylyq qyzmetke taǵaıyndalýy týraly Joǵarǵy sot, Bas prokýratýra jáne Ishki ister mınıstrliginiń aqparattary tyndaldy.
BUU Qaýipsizdik keńesiniń 2000 jylǵy 31 qazanda qabyldaǵan 1352 qararda daǵdarys pen shıelenisterdiń aldyn alý jáne olardy sheshýde áıelderdiń alar orny, sondaı-aq qaýipsizdik pen beıbitshilikti nyǵaıtýǵa baǵyttalǵan barlyq is-áreketterde áıelderge teń quqyq berilýiniń mańyzdylyǵy jan-jaqty qamtylǵan.
Qazirgi ýaqytta elimizdiń sot korpýsynda jumys isteıtin 2 382 sýdıanyń jartysynan kóbi - qyz-kelinshekter (52,6%). Aýdandyq sottarda sýdıalyq qyzmettegi áıelderdiń úlesi de artýda (54,3%). Sot júıesindegi ákimshilik-memlekettik qyzmetshiler qatarynda áıelder sany 65,4%-dy qurap otyr. Olardyń ishinde 370 (61%) áıel basshylyq qyzmette. 1071 áıel prokýratýra organdarynda qyzmette, bul jalpy qyzmetkerlerdiń 22%-y, onyń ishinde 7%-y (73) basshylyq qyzmetti atqarýda. Sońǵy bes jylda quqyq qorǵaý qyzmetinde de áıelder sany artqan. Qazirgi ýaqytta bul salada 12 414 áıel (14%) qyzmette bolsa, onyń ishinde 657 áıel (5,3%) basshylyq laýazymda.
Sonymen qatar otyrysta Ulttyq komıssııanyń bıylǵy qyzmetine qorytyndy jasalyp, keler 2022 jylǵa mindetter atalyp ótti.
Otyrys sońynda QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova Ulttyq komıssııanyń atynan áıel men bala múddesin qorǵaýǵa, elimizde otbasy saıasatyn nyǵaıtýǵa qosqan úlesi úshin úkimettik emes uıymdar men halyqaralyq uıymdardyń ókilderine alǵys hattar tabystady.
Qazirgi ýaqytta elimizde áıelder men qyzdardyń quqyqtaryn keńeıtý, zorlyq-zombylyqtan qorǵaý, reprodýktıvti densaýlyqty nyǵaıtý salalarynda halyqaralyq áriptestermen birlesken birqatar jobalar iske asyrylýda.
Aıta ketsek, is-shara aıasynda «Táýelsiz Qazaqstannyń otbasylyq jáne genderlik saıasaty: tabystar men jetistikter» taqyrybynda fotokórme uıymdastyryldy.
