Qazaqstan • 14 Jeltoqsan, 2021

Elimizdiń úzdik belsendi jastary marapattaldy

96 ret kórsetildi

Táýelsizdiktiń 30 jyldyǵy qarsańynda elordada «Nur Otan» partııasynyń jastar qanaty uıymdastyrǵan «Jastar – Otanǵa!» syılyǵyn saltanatty tapsyrý rásimi ótti. Eń belsendi volonterler, janashyr mesenattar men qoǵamdyq uıymdar 7 nomınasııa boıynsha marapattaldy, dep habarlaıdy Egemen.kz.

Jas belsendiler bilim berý, densaýlyq saqtaý, áleýmettik qorǵaý salalaryndaǵy jemisti eńbegi men COVID-19 pandemııasymen kúreste erekshe kózge túskeni úshin Memleket basshysynyń Jarlyǵymen bekitilgen «Halyq alǵysy» medalimen marapattaldy.

Marapattaý rásimi barysynda «Nur Otan» partııasy Tóraǵasynyń Birinshi orynbasary Baýyrjan Baıbek egemendik jarııalanǵan alǵashqy kúnnen bastap elimizde jastardy qoldaýǵa jáne olardyń óz qabiletin júzege asyrýyna jaǵdaı jasaýǵa erekshe nazar aýdarylǵanyn atap ótti.

Táýelsizdiktiń alǵashqy jyldaryndaǵy kúrdeli ekonomıkalyq jaǵdaıǵa qaramastan, Elbasy, elimizdiń Tuńǵysh Prezıdenti Nursultan Nazarbaev «Bolashaq» halyqaralyq stıpendııasyn taǵaıyndady. Sonyń arqasynda 14 myńnan astam adam álemniń úzdik oqý oryndarynda bilim aldy.

О́tken jyly Memleket basshysy Qasym-Jomart Toqaev Parlamentke jáne jergilikti ókildi organdarǵa saılaý partııalyq tizimderinde jastarǵa kvota belgiledi. Bul olardyń eldegi qoǵamdyq-saıası prosesterge belsendi atsalysýyna yqpal etetin bolady.

Jastardyń ómir súrý deńgeıin jáne áleýmettik jaı-kúıin arttyrý jónindegi naqty sharalar 2025 jylǵa deıingi «Jastar – Otanǵa!» baǵdarlamasynda kórsetilgen.

«О́zderińiz biletindeı, pandemııanyń birinshi tolqyny kezinde 5 myń jasotandyq Elbasy bastamashylyq etken «Biz Birgemiz!» jalpyulttyq aksııasy aıasynda 320 myń otbasyǵa ataýly kómek kórsetti. «Jas Otan» belsendileri Arys pen Maqtaaraldy qalpyna keltirýge de atsalysty. «Jas Otan»-nyń qoldaýymen qurylǵan «Biz Birgemiz!» volonterlik qozǵalysynyń qatysýshylarymen maýsym aıynda ótken kezdesý barysynda «Jastar – Otanǵa!» syılyǵy taǵaıyndalǵanyn jarııalaǵan edik. Biz búgin sony qorytyndylaımyz», dedi Baýyrjan Baıbek.

Onyń aıtýynsha, partııa jastardyń bastamalaryn, onyń ishinde volonterlikti kótermeleı otyryp, odan ári de jan-jaqty qoldaýdy jalǵastyrady.

Elimizdegi ár aýdan, qala men oblysqa arnalǵan «Jastar-Otanǵa!» baǵdarlamasyn júzege asyrý aıasynda jyl basynan beri volonterlik jumysqa 60 myńnan astam jas tartyldy. Birqatar óńirlerde jastardyń turǵyn úı baǵdarlamalary qabyldanyp, talapkerlerge 75 myń grant bólindi, stýdentterdiń shákirtaqysy 2 esege, al rezıdentter, magıstranttar men doktoranttardyń stependııasy 1,5 eseden astamǵa kóbeıtildi.

Partııanyń jastarǵa arnalǵan saılaýaldy ýádeleriniń oryndalýyn baqylaýdy «Nur Otan» partııasynyń Májilis pen barlyq deńgeıdegi máslıhattardaǵy 600-den astam halyq qalaýlylarynan turatyn Jas depýtattar korpýsy júzege asyrady. Jastar saıasaty salasyndaǵy ózekti máseleler partııanyń respýblıkalyq jáne óńirlik qoǵamdyq keńesteri alańynda da qaralýda.

Partııanyń baspasóz qyzmeti atap ótkendeı, Qazaqstannyń túkpir-túkpirinen 16-35 jas aralyǵyndaǵy 230 adam syılyq laýreattary retinde iriktelip alynǵan. Úzdikterdi anyqtaý úshin qurylǵan arnaıy komıssııanyń quramynda Májilis depýtattary, qoǵam qaıratkerleri, blogerler jáne t.b. boldy.

Sonymen, «Úzdik volonter» nomınasııasynda «Biz birgemiz!» aksııasyna belsendi qatysqany úshin Batys Qazaqstan oblysynan Nursultan Qabaev pen Eýropa elderinde granttyq negizde jastardy oqytýdy uıymdastyrǵan shymkenttik Danara Saranova marapattaldy.

«Jyldyń jas qaharmany» atalymynda Jambyl oblysynan kelgen Jaqsylyq Áshirbaev syılyqqa ıe boldy. Ol bıyl tamyz aıynda áskerı bólimniń qoımasyndaǵy órtti sóndirýge qatysyp, jaraqat alǵan.

«Jas Otan» Jastar qanatynyń jyl belsendisi» nomınasııasynda Shyǵys Qazaqstan oblysynan Ásem Shalqarova, Túrkistan oblysynan Nuraıym Qýandyq jáne Aqtóbe oblysynan Álisher Tynyshtyq úzdik dep tanyldy.

«Áleýmettik jelilerde volonterlikti nasıhattaǵany úshin» atalymy boıynsha syılyqty tanymal bloger Janserik Qadyrbaev aldy.

Qan donorlyǵy boıynsha mobıldi qosymsha – «Donorym» jobasy úshin Qaraǵandy oblysynan Rýzı Shıhov «Úzdik stýdenttik joba» nomınasııasyna ıe boldy.

Jyldyń úzdik volonterlik jobalary «Love and Pet Atyrau» jáne «Biz Birgemiz» volonterlik qozǵalysy boldy.

«Jas Otan» Jastar qanatynyń aımaqtyq úzdik fılıaly» nomınasııasy boıynsha Shymkent jáne Nur-Sultan qalalarynyń fılıaldary jeńimpaz atandy.

z

Sońǵy jańalyqtar

ShQO-da elikti atqan brakoner sottaldy

Qoǵam • Búgin, 11:20

Uqsas jańalyqtar