Atalǵan jarysqa elimizdiń 11 oblysynan kelgen 25 komanda qatysty. Týrnırdiń ashylý saltanatynda Talǵar aýdandyq sport basqarmasynyń basshysy Amanjol Nuǵmanov, Abaı atyndaǵy QazUPÝ-dyń janyndaǵy О́ner jáne mádenıet ınstıtýtynyń dırektory Toqqoja Muqajanuly, grek-rım kúresiniń has sheberi Nurtan Jumabekov, №2 balalar sport mektebiniń dırektory Aıgúl Oralbekqyzy, aýyr atletıkadan álem chempıony Jasulan Qydyrbaev jáne Erkinniń ata-anasy Muqash Saıdaqov pen Gúlsara Muqanova quttyqtaý sózderin aıtyp, balǵyn balýandarǵa sáttilik tiledi.
Eki kúnge sozylǵan jarys barysynda balýandar 10 salmaq dárejesi boıynsha túrli-tústi medaldardy sarapqa saldy. Jarys qorytyndysy boıynsha jalpykomandalyq esepte Shymkent qalasynyń ókilderi birinshi oryn alsa, ekinshi orynǵa Qyzylorda oblysynyń sportshylary taban tiredi. Al úzdik úshtikti Almaty qalasynyń órenderi qorytyndylady. Jarys jeńimpazdary arnaıy dıplomdar, kýboktar jáne baǵaly syılyqtarmen marapattaldy.
Jarystyń bas tóreshisi Erlan Imanǵalıevtiń aıtýynsha, osyndaı jarystardyń jıi uıymdastyrylyp turǵany abzal. Birinshiden, bul – halyqaralyq arenada el mereıin asqaqtatqan sportshyǵa degen qurmet. Ekinshiden, túrli básekelerge jıi qatysqan jas balýandardyń sheberligi artyp, olar psıhologııalyq turǵydan da shyńdala túsedi.
