Saltanatty sharaǵa memleket jáne qoǵam qaıratkerleri, depýtattar, ǵalymdar, muraǵat salasynyń qyzmetkerleri men BAQ ókilderi qatysyp, ortalyq qyzmetiniń negizgi baǵyttarymen, táýelsiz Qazaqstannyń damý tarıhyn ashatyn fotoqujattyq ekspozısııalarmen tanysty.
Eraly Toǵjanov quttyqtaý sózinde arhıv salasyn jetildirý, memlekettik jáne vedomstvolyq arhıvterdiń fýnksııalaryn avtomattandyrý boıynsha aqparattyq tehnologııalardy engizý boıynsha qabyldanǵan sharalar tizbegin atap ótti.
Sondaı-aq, Premer-Mınıstrdiń orynbasary «muraǵatshy» mamandyǵynyń bedelin arttyrý, kásibı kadrlardy tartý maqsatynda memleket jyl saıyn jalaqyny kóterý, dýaldi bilim berý, «Bolashaq» halyqaralyq stıpendııasyn taǵaıyndaý ispettes sharalar keshenin qabyldanǵanyna toqtala ketti.
Mádenıet jáne sport mınıstri Aqtoty Raıymqulova muraǵat salasy kadrlarynyń biliktiligin arttyrý jáne qaıta daıarlaý, onyń ishinde restavrator, ǵylymı-tehnıkalyq jáne aýdıovızýaldy qujattardy óńdeý sııaqty tar mamandyqtar boıynsha alǵash ret ashylǵan ortalyqtyń mańyzdylyǵyn atap ótti.
