Kitapta aǵylshyn tiliniń álemdik tilge aınalýy, ony úırený jolynda saıahattaýdyń mańyzy, jalpy balaǵa tildi qaı jastan bastap oqytý kerek, osy sekildi birqatar ózekti máseleler qamtylǵan.
«Bul kitap aǵylshyn tilin úırenýshilerdiń ata-anasyna arnalǵan jáne ózge tildi úırene otyryp, ulttyq qundylyqtardy qalaı joǵaltpaýǵa bolady, aǵylshyn tilin úırenýdiń qajettiligi qandaı degen syndy saýaldarǵa jaýap beredi. Aǵylshyn tilin úırenýge baılanysty otbasyndaǵy, qoǵamdaǵy ózekti taqyryptardy kóterdik», deıdi kitap avtory Aıgúl Qanatqyzy.
Sonymen qatar, saltanatty is-sharada «Bilim – kúsh» qoǵamdyq qory Táýelsizdiktiń 30 jyldyǵyna arnaıy jalpy orta bilim beretin mektepterdiń aǵylshyn tili páni muǵalimderi men oqýshylary arasynda uıymdastyrǵan respýblıkalyq «Meniń elim – Meniń maqtanyshym» baıqaýynyń jeńimpazdaryn marapattaý rásimi boldy. Baıqaýda oza shapqan ustazdar Batys qazaqstandyq Aınur Sısenova, qyzylordalyq Nurgúl Jamalbekova jáne Almaty oblysynan Merýert Hamıtova arnaıy Alǵys hattarmen marapattalyp, estelik syılyqtarǵa ıe boldy.
Kitap «Bilim – kúsh» qorynyń demeýshiligimen jaryq kórip otyr. Qor el aýmaǵyndaǵy jalpy orta bilim beretin mektepterdiń aǵylshyn tili páni muǵalimderiniń biliktiligin arttyrýǵa, tájirıbe almasýyna jaǵdaı jasaýǵa jumystanady.
«Abaılańyz, aǵylshyn tili!» kitaby jaqyn kúnderi elimizdiń kitap dúkenderinde satyla bastaıdy. Satylymnan túsken qarajat «Bilim – kúsh» qorynyń aldaǵy bastamalaryna jumsalady.
