«Eń aldymen, olar qalanyń ákimshilik ǵımarattaryn, Almaty qalasyndaǵy telearnalardyń keńselerin basyp alyp, qıratty. Ortalyq teledıdarda tikeleı efırge shyǵýǵa birneshe áreket jasaldy. Eki ret shekara áskeriniń kúshimen Kóktóbedegi telemunaraǵa jasalǵan shabýyldyń beti qaıtaryldy. Áýejaı men birneshe ushaq jedel basyp alyndy. Barlyq basyp alynǵan obektilerde barrıkadalar men blokbeketter ornatyldy. Tutqyndalǵan ákimdiktiń ár qabatynda sodyrlar kezekshilik etti, barlyq kirip-shyǵatyn dálizderdi qadaǵalady. Olar qala boıynsha ońtaıly baǵyttar boıynsha qozǵalyp otyrǵan. О́zara arnaıy jeke baılanys jelisin qoldanǵan bolýy múmkin», dedi Prezıdent ákimshiligi basshysynyń birinshi orynbasary.
Onyń aıtýynsha, terrorıster jaǵynan arnaıy vıntovkalary bar mergender áreket etken.
«Mergender syrtqy baqylaý kameralary, baılanys jáne aýdıovızýaldy aqparatty berý quraldarynyń kózin joıdy. Basty kózdegenderi quqyq qorǵaý organdarynyń qyzmetkerleri boldy. Jas kýrsanttyń basyn kesip ketken kem degende bir jaǵdaı belgili. Qazirgi ýaqytta 18 qyzmetkerdiń qaıtys bolǵany anyqtaldy», dedi Dáýren Abaev.
