Qazaqstan • 18 Qańtar, 2022

Álem chempıony Bıbisara Asaýbaeva sheberlik synybyn ótkizdi

Jyldam shahmattan (blıs) álem chempıonatynyń jeńimpazy Bıbisara Asaýbaeva elordaǵa keldi. Grossmeıster Nur-Sultan qalasynyń kishkentaı shahmatshylarymen bir partııa shahmat oınap, sheberlik saǵatyn kórsetti, dep habarlaıdy Egemen.kz.

Arman MANARBEKULY

Álem shahmaty tarıhyndaǵy eń jas chempıon atanǵan sportshyny keshe áýejaıdan QR MSP Sport komıteti, Qazaqstan shahmat federasııasy ókilderi, jankúıerleri, jas shahmatshylar kútip alǵan bolatyn. Bıbisara 25-30 jeltoqsan aralyǵynda Polshadaǵy chempıonatqa qatysyp, el abyroıyn asqaqtatty.

«Varshava qalasyndaǵy týrnır 5 kúnge jalǵasty. Rapıdten ekinshi oryn, blısten birinshi orynǵa qol jetkizdim. Bul jarysqa óte tyńǵylyqty daıyndaldym. Buǵan deıingi eń joǵarǵy jetistigim 13 jasymda rapıdten 10-oryn alǵanym edi. Jeńis tuǵyrynda turyp, Qazaqstannyń gımni oınaǵanda erekshe maqtanysh seziminde boldym. Qazaqstandyq jankúıerlerdiń qoldap jatqanyna óte qýanyshtymyn», dep alǵysyn bildirdi Asaýbaeva.

Qazaqstan shahmat federasııasy ókilderi otandyq jas shahmatshylardy Bıbisaranyń jeńisi jigerlendiretinin aıtyp otyr. Onyń ústine osy jas býynnyń arasynan myqty sportshylardyń joǵary nátıje kórsetý tendensııasy Qazaqstanda erekshe baıqalady.

«Bıbisaranyń jeńisin álemdik rekord deýge bolady. О́ıtkeni ol ázirge álemniń eń jas chempıony. Eresekter arasynda endi Qazaqstanda da chempıon bar. Bul jas býyn úshin alǵa umtylýǵa sebep bolady. Bıbisaranyń keleshekte budan da úzdik nátıjeler kórsetýine potensıaly bar. Jalpy, 2021 jyl Qazaqstannyń shahmat sporty úshin óte sátti aıaqtaldy. 9 jyl boıy grossmeıster shyqpap edi, mine, bıyl eki sportshymyz grossmeıster atandy. Sochıdaǵy álem kýbogynda jaqsy jetistikterge jettik, Olımpıada oıyndarynda qurama 8-oryn aldy. Qazaqstanda 10 myń bala shahmatpen aınalysady, úmitimiz sol jastarda», - dedi Rýslan Ysqaqov.

Mysaly, 10 jasqa deıingi balalar arasynda Qazaqstan chempıony bolǵan Aıarý Altynbek Bıbisaranyń jetistigin qaıtalaǵysy keledi.

«Men buǵan deıin Astananyń 3 dúrkin jeńimpazy boldym. Azııa chempıonatynda 2-oryn aldym. Búgin Bıbisarany kútip alyp, tanystym. Onymen kezdeskenime qatty qýanyshtymyn. Men de Bıbisary sııaqty álem chempıony atanǵym keledi», deıdi kishkentaı shahmatshy.

Rapıd jáne blısten álem chempıonaty (FIDE World Rapid and Blitz ) - sport jankúıerleriniń kópshiligi úshin shahmat kúntizbesindegi eń súıikti jáne asyǵa kútetin oqıǵalardyń biri. 2021 jyly aýqymdy sharaǵa 50 elden 200-ge jýyq sportshy – álem chempıondary men vıse-chempıondary, qazirgi el chempıondary jáne álemniń reıtıngi joǵary shahmatshylary qatysty.

Buǵan deıin Asaýbaeva klassıkalyq shahmattan 8, 10, 12 jáne 14 jasqa deıingi qyzdar arasynda álem chempıony, 7, 9 jasqa deıingi mektep oqýshylary arasynda álem chempıony atanǵan.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz