Qoǵam • 27 Qańtar, 2022

Eńbek kodeksine ózgerister engizilýi múmkin

166 ret kórsetildi

Senator Narıman Tóreǵalıev óndiristegi jaraqattanýdyń joǵary deńgeıine alańdaýshylyq bildirdi, dep habarlaıdy Egemen.kz.

Spıker usynǵan derekterge sáıkes, jyl saıyn elimizde 1 500-ge jýyq adam óndiriste jaraqat alady, onyń ishinde 200-den astam jumysshy qaıtys bolady, al 600 adam eńbek jaraqattary men kásibı aýrýlar saldarynan múgedektik alady.

«2020 jyly júrgizilgen tekserý nátıjeleri boıynsha 1,6 mln jumyskerdiń 22%-y zııandy jáne qaýipti eńbek jaǵdaılarynda jumys isteıtini anyqtaldy. Nátıjesinde jyl saıyn 500-ge jýyq adamda kásiptik aýrýlardyń alǵashqy belgileri tirkeledi. Budan basqa, 2020-2021 jyldary eńbek ınspektorlary anyqtaǵan 11 myńnan astam buzýshylyqtardyń 34%-y eńbek qaýipsizdigi jáne eńbekti qorǵaý salasynda tirkelgen», dedi Narıman Tóreǵalıev palatanyń jalpy otyrysynda.

Qazirgi ýaqytta elimizde jumys istep turǵan 300 myńǵa jýyq kásiporyn bar. Alaıda, olar boıynsha memlekettik baqylaýdy tek 237 eńbek ınspektory júrgizedi. Inspektorlardyń mundaı jetispeýshiligine baılanysty jyl saıyn uıymdar men kásiporyndardyń tek 3%-yn tekserýlermen qamtý múmkin bolyp otyr. Bul, senator túsindirip ótkendeı, quzyretti organdar óndiristegi jazataıym oqıǵalardyń aldyn alýmen kúrespeıdi, tek postfaktým jumys isteıdi.

Sonymen qatar, Kásipkerlik kodeksine sáıkes ınspektorlar josparly tekserý júrgizý týraly 30 kúntizbelik kún buryn eskertýge mindetti. Qyzmetkerlerdiń ómiri men densaýlyǵyn qorǵaý úshin halyqaralyq eńbek uıymynyń normalary boıynsha ınspektorlar jospardan tys tekserýler júrgizýge de quqyly bolýy tıis.

«Kásipkerlik kodekste kózdelgen eńbek ınspektorlarynyń qyzmetin shekteý týraly normalardy Halyqaralyq eńbek uıymynyń konvensııalaryna sáıkes keltirý mańyzdy dep sanaımyz. Sonymen qatar, memlekettik eńbek ınspektorlarynyń sanyn arttyrý máselesin pysyqtaý, sondaı-aq óndiristegi jazataıym oqıǵalar faktisi týraly ýaqtyly habarlamaǵany úshin jumys berýshiniń ákimshilik jaýapkershiligin kúsheıtý máselesin qaraý qajet», dedi senator.

Depýtat senatorlardyń bastamasy boıynsha qazir elimizdiń Eńbek kodeksine tıisti ózgerister men tolyqtyrýlar engizý týraly zań jobasyn ázirleýge daıyndalyp jatqanyn atap ótti.

Sońǵy jańalyqtar

Uqsas jańalyqtar