Is-sharaǵa AQSh-tyń ońtústik jáne Ortalyq Azııa isteri jónindegi memlekettik hatshysynyń kómekshileri Donald Lý jáne Eýropa men Eýrazııa isteri boıynsha Karen Donfraıd, sondaı-aq Ázerbaıjan, Armenııa, Grýzııa, Qyrǵyzstan, Tájikstan, Túrkimenstan jáne О́zbekstannyń joǵary ókilderi qatysty. Kezdesýdiń moderatory AQSh-tyń Qazaqstandaǵy burynǵy elshisi Rıchard Hoýgland boldy.
QR Prezıdentiniń Arnaıy ókili Erjan Qazyhan Kaspıı óńiri elderiniń AQSh-pen yntymaqtastyǵyn damytý úshin eleýli áleýeti baryn atap ótti.
«Biz AQSh-pen birqatar negizgi baǵyttar boıynsha, sonyń ishinde terrorızmge jáne qaýipsizdiktiń basqa da syn-tegeýrinderine qarsy kúres, tranzıttik-kólik júıesin ártaraptandyrý, klımattyń ózgerýine qarsy is-qımyl jasaý, áıelderdiń ekonomıkalyq quqyqtary men múmkindikterin keńeıtý boıynsha is júzinde ózara is-qımyl jasaý úshin tıimdi múmkindikterdi kórip otyrmyz», dedi Erjan Qazyhan.
Qazaqstandaǵy qańtar oqıǵalary jóninde Erjan Qazyhan Memleket basshysynyń eldiń saıası, ekonomıkalyq jáne ınstıtýsıonaldyq jańǵyrýyn jalǵastyrýǵa degen berik ustanymyn erekshe atap ótti.
«Jaqyn arada jańa kabınet 2022 jylǵa arnalǵan is-qımyl josparyn usynady. Osylaısha, jańa ekonomıkalyq saıasat jańa Qazaqstannyń negizine aınalady», dep túıindedi ol.
Qazaqstanda bolǵan oqıǵalar D. Lý usynǵan baıandamasynyń da basty nazarynda boldy. Ol QR basshylyǵynyń odan ári saıası jáne ekonomıkalyq qaıta qurýlar baǵytyn jalǵastyrýdy qamtamasyz etetinine senim bildirdi.
«Batystyń mindeti - Qazaqstandy úıretý emes, qoldaý jáne elge qańtar aıynda týyndaǵan adam quqyqtary máselesin túsinýge múmkindik berý jáne bolashaqta mundaı jaǵdaıdyń aldyn alý úshin qajetti áleýmettik, saıası jáne ekonomıkalyq reformalardy odan ári damytý», dedi D. Lý.
Jalpy, vebınarǵa qatysýshylar saıası, ekonomıkalyq jáne mádenı-gýmanıtarlyq dıalogty odan ári damytý maqsatynda aımaq elderiniń AQSh-pen yntymaqtastyǵynyń mańyzdylyǵyn atap ótti.
