Polısııaǵa alaıaqtyq faktisi boıynsha alkogol ónimderiniń saýdasymen aınalysatyn kásipker júgindi.
Kásipker áıeldiń aıtýy boıynsha, Tájikstan Respýblıkasynan kelgen jumysshynyń biri onyń 3,1 mln teńgesin aldap, ıemdenip ketken.
«24 jastaǵy sheteldik azamat ótken jyldyń jazynan bastap dúkende júk tıeýshi bolyp jumys istegen. Kásipkerdiń senimine kirgen ol, áıelge kóterme baǵamen alkogol satyp alýdy usynǵan. Jigit sýpermarketterdiń iri jelileriniń birinen dosy oǵan arzan baǵamen alkogol alýǵa kómektesetinin aıtqan. Sodan JK ıesi qajetti somany qyzmetkeriniń qolyna berip, onymen birge taýardy jetkizý úshin «Gazel» avtokóligin jibergen. Kúdikti júrgizýshini sýpermarkettiń turaǵynda qaldyryp, ózi ishke kirip ketip belgisiz baǵytqa qaraı boı tasalaǵan.
Polısııa qyzmetkerleri jedel-izdestirý sharalary barysynda sheteldik azamatty Saryaǵash qalasynda ustady. Qazirgi ýaqytta alaıaqtyq faktisi boıynsha sotqa deıingi tergeý júrgizilýde», dep habarlady Nur-Sultan qalasynyń Polısııa departamenti.
Kúdikti PD ýaqytsha ustaý ızolıatoryna qamaldy.
