Kezdesýde «Teńizshevroıl» (TShO) Bolashaqta keńeıtý jobasyn jáne Saǵalyq qysymdy basqarý jobasyn iske asyrý, Qarashyǵanaq jobasyn keńeıtý jáne Kaspıı qubyr konsorsıýmynyń qýatyn arttyrý perspektıvasy talqylandy.
«Barlyq iske asyrylyp jatqan jobalardy ýaqytyly iske qosýdy qamtamasyz etý qajet. Jumyskerlerdi josparly túrde bosatýǵa jáne jumyspen qamtýǵa sapaly monıtorıng júrgizýdiń mańyzy zor», dedi Á. Smaıylov.
Premer-Mınıstr QR Úkimeti Teńiz ken ornyn damytýǵa erekshe nazar aýdaratynyn jáne «Shevron» kompanııasymen uzaq merzimdi yntymaqtastyqty ári qaraı damytýǵa nıetti ekenin atap ótti. D. Djonson QR Úkimetine qolaıly ınvestısııalyq ahýaldy jáne munaı-gaz salasyndaǵy jobalardy iske asyrý kezinde týyndaıtyn máselelerdi sheshýdi qamtamasyz etkeni úshin alǵys aıtty.
«Shevron» – Qazaqstandaǵy Teńiz (50%), Qarashyǵanaq (18%) jáne Kaspıı qubyr konsorsıýmy (15%) úsh iri jobada aktıvteri bar iri sheteldik ınvestor. 2021 jyly TShO-da shıki munaı óndirý kólemi 26,55 mln tonnany qurady. Bıyl 28,73 mln tonna kóleminde munaı óndirý josparlanýda. 2023 jyldyń sońynda Bolashaqta keńeıtý jobasyn aıaqtaý ken óndirý kólemin jylyna 12 mln tonnaǵa ulǵaıtýǵa múmkindik beredi.
TShO shıkizatymen Atyraý oblysynda polıpropılen (qýaty – jylyna 500 myń tonna) jáne polıetılen (qýaty – jylyna 1,25 mln tonna) óndirisi boıynsha eki iri gaz-hımııa jobasyn qamtamasyz etý máselesi pysyqtalýda. 2021 jyly qazan aıynda QR Energetıka mınıstrligi men «Shevron» kompanııasy arasynda Qazaqstanda kólemi $248,5 mln quraıtyn Tikeleı ınvestısııalar qoryn qurý boıynsha ózara túsinistik týraly memorandýmǵa qol qoıyldy.
Qor kapıtaldandyrýyn «Shevron»-ǵa QR-da túsken paıdanyń bir bóligi quraıdy. Qor qarajaty Qazaqstannyń munaı-gaz salasynda, qorshaǵan ortany qorǵaýda, sondaı-aq aqparattyq jáne sıfrlyq tehnologııalar salasynda taýarlar óndirý, jumystardy oryndaý jáne qyzmetter kórsetý kommersııalyq kásiporyndaryna ınvestısııalaý arqyly ekonomıkany jáne jergilikti qamtýdy damytýǵa baǵyttalatyn bolady.
