Basqarma basshysy Shymkent qalasynyń 5 jyldyq damý josparyna sáıkes 2022 jyly salada 76 joba júzege asyrylatynyn atap ótti. Bul jobalarda aýyz sý - 4, káriz júıesi – 14, elektr – 14, tabıǵı gaz – 15, jylý – 5, ınjenerlik ınfraqurylym – 24 nysan bar.
Atqarylatyn jumystardyń nátıjesinde jyl sońynda megapolısti aýyz sýmen qamtý kórsetkishi 98%-dan 99%-ǵa, káriz júıesimen qamtý 54%-dan 60%-ǵa, sapaly elektrmen qamtý deńgeıi 97%-dan 99%-ǵa, tabıǵı gazben qamtylý kórsetkishin 93%-dan 94,7%-ǵa deıin kóterý josparlanýda.
Al, jylý jelileriniń tozý deńgeıi 37-den 35%-ǵa tómendeıdi. Jobalardy júzege asyrý barysynda shalǵaı eldimekenderde basa nazar aýdarylady.
Qala ákimi halyqtyń tirshilik etýine basty qajettilik ınfraqurylym júıeleri ekenin aıtyp, sala basshysyna birqatar naqty tapsyrmalar júktedi.
«Aýdandardaǵy tozyǵy jetken elektr jelileriniń barlyǵyn tekserip, kestesin jasaqtap, qadaǵalap otyrý qajet. Ábden tozyǵy jetip, aýmaq jaryqsyz qalǵan sátte emes, aldyn ala baǵamdap, jóndeý jumystaryn jasap otyrý kerek, jekemenshik nysandaǵy ınfraqurylym júıeleriniń sapasyna da mán berip, olardy tekseretin mehanızmniń jumys isteýin qamtamasyz etý qajet. Jobanyń mańyzdylyǵy - sanynda emes, halyqqa tıimdiliginiń joǵary bolýynda», dedi Murat Áıtenov.
