Malaızııanyń joǵalǵan ushaǵy tabyldy

«Malaysia Airlines» áýe kompanııasynyń joǵalǵan Boeing-777-200 ushaǵy Avstralııanyń ońtústik-shyǵysyndaǵy Úndi muhıtynyń akvatorııasynan tabyldy. Bul týraly ITAR-TASS habarlady. Bıylǵy 8 naýryz kúni joǵalǵan bul ushaq týraly ártúrli boljam aıtylyp kelgen edi. Sol sońǵy aqparlardyń birinde ushaqtyń Vetnamǵa qarasty Tho-Chý aralynan 300 shaqyrym jerde, ıaǵnı soltústik-batystaǵy Kamaý múıisinde apatqa ushyraǵany týraly boljam aıtylǵan. Keıin áýe laıneriniń Úndi muhıty ústimen ushyp ótip, Avstralııa jaǵalaýyna bettegeni belgili boldy. Osyǵan oraı izdeýshiler ózderiniń nazarlaryn solaı qaraı aýdarǵan boltyn. Aqyrynda sol joramal durys shyqty. Malaızııa  premer-mınıstri 24 naýryz kúni izdeý jumystarynyń qazirge deıingi nátıjesi boıynsha málimdeme jasap, joǵalǵan ushaqtyń qańqasy tabylǵanyn jetkizdi. Ol osy ýaqytqa deıin aıtylǵandardyń bári boljam ǵana ekenine toqtalyp, laınerdiń Avstralııanyń  ońtústik-shyǵys qaptalyndaǵy Úndi muhıtyna qulaǵanyn rastady. Eske sala keteıik, naýryzdyń 8-ine qaraǵan túni Malaızııanyń astanasy – Kýala-Lýmpýr qalasynan ushyp shyqqan «Boıng»  arada eki saǵattaı ýaqyt ótkende, baqylaýshy radardyń nazarynan tysqary qalyp qoıǵan bolatyn. Sodan beri ony qaıtyp kórgen eshkim bolǵan joq. Tek baqylaýdan ketip qalǵan ushaqtyń áýede taǵy jeti saǵattan astam ýaqyt ushyp júrgeni ǵana belgili bolǵan. Endi, mine, onyń qaıda baryp, qaıda qulaǵany anyqtalyp otyr.  Malaızııa premer-mınıstri oǵan qatysty keńirek málimettiń búgin júrgiziletin baspasóz máslıhatynda aıtylatynyn sóz etti. Jalpy, joǵalǵan ushaqta 227 jolaýshy, 12 ekıpaj múshesi, barlyǵy 239 adam bolǵan edi. О́kinishke qaraı, solardyń báriniń apat qurbandyǵyna ushyraǵandary endi aıǵaqtalyp otyr. Malaızııa  úkimeti marqumdardyń otbasyna kóńil aıtý jedelhatyn joldady. Ámirhan Almaǵanbetov. Derekkóz: ITAR-TASS. Foto: www.Ctv.by.