Vashıngton shtatynda joǵalǵandar sany 176-ǵa jetti

Amerıkanyń Vashıngton shtatynda 22 naýryzdan bastap oryn alǵan laısań kóshkininen keıin 176 adamnyń joq bolyp ketkeni málim etildi. Bul týraly «Gazeta.Rý» habarlady. Buǵan deıin habar-osharsyz ketkender sany 108 ekeni atap kórsetilgen bolatyn. «Jaǵdaı óte aýyr.  Áli de topyraq úıindiler astynan tiri adamdar alyp shyǵamyz degen úmitimiz bar. Alaıda, ashyǵyn aıtaıyq, senbi kúni arshyp alǵan jerlerimizden birde-bir tiri adam tappadyq», - dedi jergilikti órt kúzetiniń bastyǵy Trevıs Hots. Laı topyraq kóshkini 22 naýryz kúni Sıeldiń sol jaǵynda bastaldy. Nóserletip jaýǵan jaýynnan paıda bolǵan tasqyn Stılagýamısh ózeniniń bir tarmaǵyn jaýyp tastap, topan bolý qaýpin týǵyzdy. Sondyqtan bılik ózen boıyndaǵy qaýip tóngen aýdandar turǵyndaryn basqa jaqtarǵa kóshirýdi jedeldetip qolǵa aldy. Osy kezge deıin 30 eldi meken úlken búlinshilikke ushyrap, olarda 14 adamnyń qaza tapqany aıtylyp otyr. Murat Aıtqoja. Derekkóz: Gazeta.Rý. Foto: AP Photo/The Seattle Times.