Onlaın ótken saltanatty oqıǵaǵa Almatydaǵy eki Konfýsıı ınstıtýty men ál-Farabı atyndaǵy Qazaq Ulttyq ýnıversıteti, Lanchjoý ýnıversıteti, Abylaı han atyndaǵy Qazaq halyqaralyq qatynastar jáne álem tilderi jáne Ońtústik-Batys ýnıversıtetteri de ortaqtasty.
Mereıtoılyq shara barysynda Almatydaǵy QHR Bas konsýly Szıan Veı hanym, Almatydaǵy QR SIM О́kildigi jetekshisiniń orynbasary Rýslan Málikuly, Halyqaralyq qytaı tili bilim berý ortalyǵynyń bas hatshysy Chjao Lınshan, ál-Farabı atyndaǵy QazUÝ rektory Janseıit Túımebaev, Lanchjoý ýnıversıtetiniń rektory, Qytaı ǵylym akademııasynyń akademıgi Iаn Chýnhýa, Ońtústik-Batys ýnıversıtetiniń rektory Chjan Veıgoı, Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń oqý isteri jónindegi prorektory Ásel Chaklıkova sóz aldy.
Qashyqtan jyly lebizderin jetkizgen qonaqtar osy otyz jyldaǵy Qazaqstan men Qytaıdyń barlyq salada qol jetkizgen tabystaryn tilge tıek etip, onyń naqty mysaldaryn atady.
Ejelden tatý, ejelden kórshi eki memlekettiń arasyndaǵy dıplomatııalyq qarym-qatynastar eki eldiń damýyna ǵana emes, máńgilik staregııalyq áriptestikke de qurylǵany atap aıtyldy.
Qonaqtar eki eldiń ekonomıkalyq jáne áleýmettik damýynda eki jaqty tatýlyq aımaqtyq turaqtylyq máselesinde de asa mańyzdy ról atqaratyndyǵyna toqtala kele, eki memlekettiń keleshegi munan da jarqyn bolatyndyǵyna senim bildirdi.
Saltanatty sharada Almaty qalasyndaǵy eki Konfýsıı ınstıtýtynyń beıne-baıandary kórsetilip, atalmysh ınstıtýttardyń damýy men jetistikteri jan-jaqty pash etildi. Al tórt quryltaıshy-JOO-lardyń oqytýshylary men stýdentteri eki eldiń dıplomatııalyq qarym-qatynastyń ornatylǵanyna 30 jyl tolý qurmetine tamasha konserttik baǵdarlamalaryn kórsetti.
Onlaın-mereke sońynda qonaqtar Beıjińdegi Qysqy Olımpıada men Paraolımpıada oıyndaryna sáttilik tiledi.
