«Ýkraınada áskerı áreketter júrip jatyr. Jáne elden tek Qazaqstan azamattary ǵana emes, basqa el azamattary da óz elderine oralǵysy keledi. Biz qazaqstandyqtar úshin barlyq jaǵdaıdy jasap jatyrmyz. Kıevte 8 dıplomatymyz bar. Qazaqstandyqtardy Polsha shekarasyna jetkizýde elshilik ókilderi birge barýda. Biraq, mamandarymyz jetpeıdi, elshilikte de bireý qalý kerek. Otandastarymyzdy shekaraǵa jetkizgen soń, elshilik ókilderi qaıtyp kelip, kelesi top adamdardy jolǵa alyp shyǵýda», dedi Aıbek Smadııarov.
Onyń aıtýynsha, Ýkraına men Polsha shekarasynda qazaqstandyqtardy elshiliktiń ókilderi kútip tur.
«Olar tizim boıynsha bizdiń azamattardy tekserip, odan ári shyǵaryp salady. Shekarada 2 eldiń de keden qyzmeti shuǵyl ári tótenshe rejımde jumys isteýde. Bastysy olar túsinistikpen qaraýda. Bizdiń dıplomattar Ýkraına qalalary men Polsha shekarasy arasynda jantalasyp júr. Sondaı-aq jedel jeli jumys istep turǵanyn eske salamyz. Ýkraına shekarasyndaǵy uzynsonar keptelis 20-40 shaqyrymǵa deıin sozylǵan. Biz eshkimdi qaldyrmaımyz, barlyq azamattardy alyp shyǵamyz», deıdi ol.
