EQYU PA ODM jónindegi arnaýly ókili Asqar Shákirov óz baıandamasynda 2030 jylǵa qaraı qoıylǵan maqsattarǵa qol jetkizý kestesi belgili bir túzetýdi talap etetinin atap ótti.
«EQYU Parlamenttik Assambleıasy bizge ODM iske asyrý salasyndaǵy ulttyq tájirıbemiz ben alǵan sabaqtardy, sondaı-aq ODM iske asyrý merzimderin saqtaý úshin bizdiń qadaǵalaý jáne zań shyǵarý mindetimizdi jaqsyraq júzege asyrýǵa múmkindik beretin mańyzdy aqparatpen almasýdyń biregeı platformasyn usynady», dedi vıse-spıker.
Osyǵan baılanysty árbir Parlamentte maqsattardyń resmı mártebege ıe bolýy úshin barlyq kúsh-jigerdi jumsaý usynyldy.
Senatordyń pikirinshe, Ýkraınadaǵy jaǵdaıdyń shıelenisýi EQYU aımaǵyndaǵy ornyqty damý barysynda aýyr zardap ákelýi múmkin.
«Prezıdent Qasym-Jomart Toqaev Qazaqstan EQYU 2010 jylǵy sammıti qabyldaǵan ózara senim negizinde ózara túsinistikti kózdeıtin bólinbestik pen ortaq qaýipsizdik qaǵıdatyn ustanatynyn málimdedi. Ol eki memleketti dıalogty jalǵastyrýǵa jáne beıbit jolmen retteýge barynsha kúsh salýǵa shaqyrdy», dedi qazaqstandyq parlamentshi.
Ornyqty damý maqsattary Qazaqstannyń strategııalyq qujattaryna 80%-ǵa ıntegrasııalanyp otyr. 2021 jyldyń qorytyndysy boıynsha ornyqty damý maqsattary boıynsha elimiz ótken jylmen salystyrǵanda progress ındeksindegi reıtıngin 6 tarmaqqa jaqsartyp, 166-nyń ishinen 59 orynǵa ıe boldy.
Veb-dıalog aıasyndaǵy talqy ODM taqyrybyn neǵurlym belsendi talqylaý, olardy iske asyrýǵa oraı parlamentterdi keshendi úrdisterge tartý, úzdik tájirıbeni zerdeleý men almasý qajettigi týraly EQYU parlamentshileri kózqarastarynyń birligin kórsetti.
