Marat Barmanqulov – elimizdegi jýrnalıstıka ǵylymı mektebiniń negizin qalaǵan, ulttyq teleradıo habarlaryn taratýǵa eleýli úles qosyp, kóptegen shákirt tárbıelegen ǵalym. Ol Ál-Farabı atyndaǵy QazUÝ jýrnalıstıka fakýltetinde 35 jyldan astam ýaqyt qyzmet etti.
Mereıtoıǵa oraı uıymdastyrylǵan «Jýrnalıstıka barshaǵa: medıa jáne tehnologııanyń jańa býyny» atty ǵylymı konferensııada qatysýshylar otandyq jáne álemdik jýrnalıstıkasynyń damýyn talqylady. Kórnekti ǵalymnyń shákirtteri, jas ǵalymdar Barmanqulovtyń zertteýleri búgingi zamanda da ózekti ekenin atap ótti.
Jýrnalıstıkaǵa eren eńbek sińirgen Marat Barmanqulov – buqaralyq kommýnıkasııa, mádenıettaný jáne túrkitaný boıynsha kóptegen kitaptardyń avtory. «Jalpyǵa arnalǵan jýrnalıstıka», «Televızııa men radıodaǵy reportaj», «Televızııa: Bıznes álde bılik?» atty kitaptary qazaq tiline aýdaryldy. Sondaı-aq ol túrki álemin jiti tanýǵa talpyndy. Bul baǵytta kóp jyl izdenip, «Túrki dúnıesi», «Altyn baba» dep atalatyn tarıhı-tanymdyq eńbekterin jaryqqa shyǵardy.
– Bizde Taýman Amandosov, Temirbek Qojekeev osy qatarda turatyn úlken uly ustazdardyń biri – Marat Káribaıuly Barmanqulov. Bıyl bul kisiniń 85 jyldyǵyn atap ótip jatyrmyz. Birinshiden, keıingi urpaq úshin, búgingi jastar úshin, stýdentter úshin úlgi-ónege bolarlyq dúnıe, – dedi jýrnalıstıka fakýltetiniń dekany Sansyzbaı Mádıev.
Konferensııa barysynda qazaq jýrnalıstıkasynyń damýy, BAQ tehnologııalary men tendensııalary, jańa medıa men sıfrlyq dáýirdiń qıyndyqtary, aqparattyq mádenıet, BAQ kadrlaryn daıarlaý máseleleri, professor M.K.Barmanqulovtyń shyǵarmashylyǵy, zertteýleri jáne muralary boıynsha ǵylymı eńbekter qabyldandy.
Jýrnalıstıka fakýltetinde Marat Barmanqulov atyndaǵy arnaıy aýdıtorııa bar. Onyń kitaptary stýdentterdiń oqý baǵdarlamasyna engizilgen. Aldaǵy ýaqytta ǵalymnyń jaqyndary men áriptesteri onyń murasyn jınaqtap, kóp tomdyq kitap etip shyǵarýdy kózdeıdi.
