Talqylaýdyń negizgi taqyryby Transkaspıı halyqaralyq kólik baǵytyn damytý boıynsha birlesken kásiporyn qurý jobasyna arnaldy. Jańa birlesken kásiporyn tarıfterdi belgileý jáne júkterdi deklarasııalaýda týyndaǵan máselelerdi retteýge, biryńǵaı aqparattyq tehnologııalar sheshimderin qoldanýǵa jáne osy baǵytta tranzıttik júkterdi biriktirýge múmkindik beredi.
Ázerbaıjannyń Ekonomıka mınıstri Mıkaıl Djabbarov, Ázerbaıjan ınvestısııalyq holdınginiń bas atqarýshy dırektory Rýslan Alıhanov jáne, SOCAR Prezıdenti m.a. – birinshi vıse-prezıdenti Rovshan Nadjaf jáne basqa da resmı laýazym ókilderimen áńgimelesý barysynda qazaqstandyq delegasııa elimizdiń Eýropaǵa eksporttyq júk aǵyndaryn Transkaspıı baǵyty boıynsha qaıta baǵdarlaýdyń ózektiligi kún tártibine shyqqanyn aıtty.
Taraptar Ázerbaıjan arqyly munaı tasymaldaýǵa qatysty yntymaqtastyqtyń mańyzdylyǵyna toqtalyp, bul qazirgi qoldanystaǵy baǵyttarǵa balama baǵyt ekenin atap ótti. Qazaqstandyq delegasııa Ázerbaıjan Respýblıkasynyń Sıfrlyq damý jáne kólik mınıstri Rashad Nabıevpen de kezdesti.
Kezdesý barysynda dáliz boıynsha kólik tarıfterin birizdendirý, eki el arqyly ótetin halyqaralyq kólik dálizderinde júk tasymaldaý kólemin ulǵaıtý úshin kedendik rásimderdi rettestirý máseleleri talqylandy.
Aımaqta bolyp jatqan qaqtyǵys oqıǵalary men geosaıası jaǵdaıdyń kúrdelenýi jańa aqıqatty aldymyzǵa shyǵardy. Qazirdiń ózinde suranys usynystan asyp ketý qaýpi týyndady. Atalǵan faktorlar negizinde jetkizý quny da, kútý ýaqyty da artyp, onyń tutynýshyǵa keri áserin tıgizeri anyq. Bul shyndyq yntymaqtastyqtyń jańa sheńberin qarastyrýdy jáne tranzıttik jáne kóliktik kommýnıkasııalardy jańasha qurýdy talap etedi.
Kezdesýde Ázerbaıjan men Qazaqstannyń geografııalyq erekshelikteri - olardyń Eýropa men Azııanyń iri ekonomıkalyq ortalyqtarynyń arasynda ornalasýy elder arasyndaǵy tıimdi jáne jaqsy jolǵa qoıylǵan kólik jelisin qamtamasyz etý úshin naqty alǵysharttar jasaǵany basa aıtyldy.
Baký-Tbılısı-Kars temirjol jelisi qurylysynyń aıaqtalýy, bul marshrýtty damytýǵa qosymsha serpin bermek. Bir naqty esep, Qytaıdan Qazaqstan arqyly Túrkııaǵa taýar jetkizý merzimin 12 kúnge deıin qysqarǵany soǵan dáıek.
Eki jaqty kezdesý nátıjesinde «Samuryq-Qazyna» AQ men Ázerbaıjan Respýblıkasynyń Sıfrlyq damý jáne kólik mınıstrligi arasynda birlesken kásiporyn qurý jáne kólik-logıstıkalyq qyzmetti júzege asyrý týraly Hattamaǵa qol qoıyldy.
