«Sonymen qatar kitapqa Qasym-Jomart Toqaevtyń 2021-2022 jyldardaǵy Qazaqstan halqyna arnaǵan joldaýlary endi. 2021 jyly Qazaqstan COVID-19 pandemııasynyń saldaryn joıýǵa, elimizdiń áleýmettik-ekonomıkalyq ósimin qaıta qalpyna keltirýge basa mán berdi. Bul Prezıdenttiń jumys kestesinen de anyq kórindi. Jınaqtyń birinshi tomyna Memleket basshysynyń 2021 jylǵy naýryz ben jeltoqsan aralyǵynda elimizdiń jáne óńirlerdiń áleýmettik-ekonomıkalyq damý máselelerine qatysty keńesterde, Úkimettiń, Qazaqstan halqy Assambleıasynyń, Ulttyq qoǵamdyq senim keńesiniń otyrystarynda, «Astana» halyqaralyq qarjy ortalyǵyn basqarý jónindegi keńeste jáne basqa da jıyndarda sóılegen sózderi toptastyryldy. Budan bólek Prezıdenttiń memlekettik merekeler men qoǵamdyq mańyzy bar ataýly kúnderge baılanysty quttyqtaýlary engizildi. Ásirese, Qasym-Jomart Toqaevtyń 2021 jylǵy qyrkúıektegi «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýyn erekshe atap ótken jón.Ekinshi tom 2022 jyldyń qańtary men naýryz aralyǵyn qamtıdy. Atalǵan kezeń elimizdegi «Qasiretti qańtar» oqıǵasymen erekshelendi. Memleket basshysynyń erik-jigeri men batyldyǵynyń, sondaı-aq barsha otandasymyzdyń birligi men yntymaǵynyń arqasynda elimiz osy aýyr synaqty eńsere bildi. Bul jınaqta Qasym-Jomart Toqaevtyń qańtar oqıǵasyna qatysty halyqqa arnaǵan málimdemeleri men úndeýlerine, sondaı-aq «Habar» jáne «Qazaqstan» telearnalaryna bergen suhbatyna aıryqsha nazar aýdarýǵa bolady. Sonymen qatar ekinshi tomǵa Memleket basshysynyń «Jańa Qazaqstan: jańarý men jańǵyrý joly» atty naýryz aıyndaǵy Joldaýy endi. Bul Joldaýda kóterilgen negizgi másele – aýqymdy reformalar men Jańa Qazaqstandy qurý», dep jazdy Berik Ýálı.
Sonymen qatar ol álemde bolyp jatqan saıası jáne áleýmettik tendensııalar men oqıǵalar Qazaqstannyń halyqaralyq arenadaǵy qyzmetin jandandyra túskenin aıtty. Sondyqtan Memleket basshysynyń ótken jylǵy jumys kestesi aýqymdy bolǵan.
«Úshinshi jınaqqa Prezıdenttiń iri forýmdarda, sondaı-aq jaqyn jáne alys shet elderge jasaǵan saparlarynda sóılegen sózderi endi. Qasym-Jomart Toqaev ótken jyly Tájikstan, Koreıa Respýblıkasy, Reseı Federasııasy, Túrikmenstan, Belgııa men Shveısarııaǵa saparmen bardy. Budan bólek Prezıdent Túrkitildes memleketter yntymaqtastyǵy keńesiniń VIII sammıtine qatysý úshin Túrkııaǵa bardy. Memleket basshysynyń BUU Bas Assambleıasynyń otyrystaryndaǵy jáne osy jahandyq uıymnyń basqa da is-sharalaryndaǵy beınebaılanys arqyly sóılegen sózderi de atalǵan jınaqqa toptastyryldy. Sondaı-aq bul tomǵa Qasym-Jomart Toqaevtyń jyl saıyn ótetin halyqaralyq is-sharalarda sóılegen sózderi engizildi. Atap aıtqanda, Joǵary Eýrazııalyq ekonomıkalyq keńes, Ashhabad qalasynda ótken Ortalyq Azııa elderi basshylarynyń konsýltatıvtik kezdesýi, Dýshanbe qalasynda ótken UQShU men ShYU otyrystary.
Budan bólek Prezıdenttiń «Essentiel des Relations internationales» jýrnalyna jáne reseılik belgili jýrnalıst jáne telejúrgizýshi Leonıd Mlechınge bergen suhbattary, Prezıdenttiń «The Parliament» jýrnalynda jarııalanǵan «Partnership with the EU will anchor Kazakhstan’s future progress» maqalasy endi» dep jazdy Memleket basshysynyń baspasóz hatshysy.
Qazaqstan Respýblıkasy Prezıdentiniń Baspasóz qyzmeti Qasym-Jomart Kemelulynyń bir jylǵy qyzmetiniń qorytyndysy retinde osy jınaqty oqyrmandarǵa usynyp otyr. Sondaı-aq jınaqta Memleket basshysynyń qatysýymen ótken is-sharalarda túsirilgen sýretter berilgen. Kitapta jarııalanǵan materıaldar qyzyǵýshylyq tanytqan zertteýshiler men memlekettik organdardyń qyzmetkerleri úshin qundy ári paıdaly qujat bolmaq.
Eske salsaq, Memleket basshysynyń sóılegen sózderi osymen úshinshi jyl jınaq bolyp shyǵyp otyr.
