«Jeke óz atymnan jáne Densaýlyq saqtaý mınıstrligi ujymynyń atynan qaıǵyly qazaǵa ushyraǵan dárigerdiń týystary men jaqyndaryna qaıǵyryp kóńil aıtamyn. Bul oqıǵa respýblıkanyń densaýlyq saqtaý salasy úshin jantúrshigerlik asa aýyr qaıǵy bolyp otyr. Beıbit ýaqytta dárigerlerge jaýyzdyq tanytqan, óz is-áreketterine jaýap bermeıtin adamnyń qolynan qaza tapty. Otandyq medısına gastroenterologııanyń damýyna zor úles qosqan, júzdegen pasıentti joǵary medısınalyq biliminiń arqasynda emdep, ómirin saqtap qalǵan asa bilikti mamanynan aıyryldy», dep jazdy Ajar Ǵınııat.
Sondaı-aq ol 3 bala jetim qalyp, qart ata-ananyń ulynan aıyrylǵanyn aıtty.
«Qaza tapqan dárigerdiń otbasy úshin qaıǵyly oqıǵanyń asa aýyr ekenin sózben jetkizý múmkin emes. Biz qylmys jan-jaqty tergeledi, sondaı-aq qaıǵyly oqıǵaǵa kinálilerdi zańnyń barlyq qatań talaptary boıynsha jazalaıdy dep senemiz. Árbir osyndaı ınsıdent búginde zańnamalyq tetikterdiń kómegimen medısına qyzmetkerleriniń quqyqtaryn senimdi qorǵaýdy qalyptastyrý, óz ómiri men densaýlyǵy úshin qoryqpaı qaýipsiz eńbek etýine kepildik beretin quqyqtyq normalardy qabyldaý qanshalyqty mańyzdy ekenin kórsetedi. Densaýlyq saqtaý mınıstrligi medısına qyzmetkerleriniń quqyqtaryn qorǵaý týraly zań jobasyn ázirledi. Jaqyn arada ol Parlamenttiń qaraýyna engiziletin bolady», dedi mınıstr.
