SportFEST Kazakhstan mektep spartakıadasynyń irikteý kezeńi aıaqtaldy

Qazaqstanda SportFEST Kazakhstan respýblıkalyq mektep spartakıadasynyń irikteý kezeńi aıaqtaldy. Oǵan 7 myńnan astam oqýshy qatysty.

Jarysta respýblıkanyń 17 óńiriniń 215 aýdanynan 2004-2007 jylǵy oqýshylar baq synasty. SportFEST Kazakhstan spartakıadasynda burynǵydaı shahmat, ústel tennısi, qyzdar arasynda basketbol, uldar arasynda fýtzal, áskerı qoldanbaly sport, toǵyzqumalaq oıyndary bar.

Saıys elimizdiń barlyq óńirinde ótti. Spartakıada eki irikteý kezeńinen turady. Aldymen barlyq oblysta jáne Nur-Sultan, Almaty, Shymkent qalalarynda aımaqtyq jarystar ótedi. Bul kezeńde aýdandyq, oblystyq mańyzy bar qalanyń komandasy ózara saıysqa túsedi. I kezeńniń jeńimpazdary «Baldáýren» lagerinde (Býrabaı qalasy) ótetin II týrda óz óńiriniń nemese qalasynyń namysyn qorǵaıdy.

SportFEST Kazakhstan - bul jas sportshylardy qoldaıtyń biregeı joba. Bul ınısıatıva Samruk-Kazyna Trust áleýmettik jobalardy damytý Qorynyń qoldaýymen ótedi. Qor balalardy qoldaý men damytýǵa arnalǵan kóptegen áleýmettik mańyzdy jobalardy júzege asyryp keledi.

Nur-Sultan qalasyndaǵy aqtyq irikteý kezeńinde fınalısterdi Samruk-Kazyna Trust áleýmettik jobalardy damytý Qorynyń Bas dırektory Alfııa Adıeva quttyqtady. Aıtýynsha sport tek rekordtar men jarystar emes, bul birinshiden jan jáne tán saýlyǵy, temirdeı tártip ári keremet orta.

«О́zderińiz biletindeı, Samruk-Kazyna Trust jumysynyń basym baǵyttarynyń biri balalarmen jumys, olardyń quqyǵyn qorǵaý, ártúrli baǵyt boıynsha naqty qoldaý kórsetý. Dál osy bastama aıasynda, qor oqýshylar arasynda salaýatty ómir saltyn ustaný qaǵıdattaryn qalyptastyryp, kóptegen jastyń sportqa kelýine yqpal etedi»,  dedi A. Adıeva.

Aıta keteıik, balalar men jasóspirimderdiń ózin-ózi tanytýyna jáne dene daıyndyǵyn túzetýge baǵyttalǵan respýblıkalyq spartakıada jastar arasynda buqaralyq sport pen patrıottyq tárbıeni nasıhattaıtyn jarys retinde tanyldy. Joba bastalǵannan beri respýblıka boıynsha 21 000-nan astam oqýshy qatysty.

«Men fýtbolmen jeti jyl boıy aınalysyp kelemin, biraq búgin umytylmas emosııalar boldy, árbir týrnır qyzyqty ótedi. Uıymdastyrýshylarǵa ózińdi taǵy bir ret dáleldep, jańa adamdarmen tanysýǵa bolatyn osyndaı týrnır úshin rahmet. Dostarmen oınaýǵa múmkindik bergenińiz úshin rahmet», dep Nur-Sultan qalasyndaǵy birinshi irikteý kezeńiniń qatysýshysy óz áserimen bólisti.

Aıta keteıik, sporttyq oıyndar ótkizý úshin qural-jabdyqtar satyp alynady da keıin sol óńirdegi mektepterge syıǵa beriledi.