«Túrkistanǵa aǵyn sý jetkizý joldary tabylyp, mańyzdy jobalar júzege asyp jatyr. Eskek esý kanaly sý sportyn damytýǵa tyń serpin beredi. О́ńirde eskek esý sportynan myqty komanda bar. Qazaqtyń jastary Túrkistanda sheberlikterin shyńdap, halyqaralyq dodalarǵa qatysatyn bolady. Bul jobaǵa respýblıkalyq deńgeıde kóńil bólinip otyr. Sondyqtan sapaly ári zaman talabyna saı bolýy tıis», dedi О́mirzaq Shókeev.
100 gektardaı aýmaqty alyp jatqan bazada eskek esý, akademııalyq esý jáne ózge de sport túrleri qanat jaıady. Sonymen birge bul nysan týrısterdi tartatyn ortalyqqa da aınalmaq. Kásibı sportpen qatar kanalda qaıyqpen serýendep, demalys ótkizýge bolady. «Keńsaı-Qosqorǵan» sý qoımasynan sý kelip, joba júzege asady. Al eskek esý bazasyndaǵy sý Túrkistan qalasynyń klımatyn ózgertý, jasyl alqapty kóbeıtýge de qoldanylady.
Túrkistanyń jazy óte ystyq keledi. Bul — jaǵajaı týrızmin damytýǵa múmkindik beredi. Buryn qala aýmaǵynda birneshe basseınnen basqa shomylatyn jer tapshy bolatyn. Endi shahar jańa jasandy kólmen jáne jaǵajaımen qamtylady. Qalada «Túrkistan» týrıstik-rekreasııalyq ortalyǵynyń qurylysy jalǵasyp jatyr. Jasandy kóldiń dambalary ornalastyrylyp, beton quıý jumysy aıaqtalǵan. Týrıstik ortalyq mańy abattandyrylyp, aǵashtar egiledi. Jaǵajaıǵa qum tóselip, demalysqa arnalǵan nysandar salynady. Oblys ákimi merdigerler men jaýapty basshylarǵa qurylysty sapaly ári ýaqytyly tapsyrýdy júktedi.
