Jýyrda Kardıologııa jáne ishki aýrýlar ǴZI-da Reseıdiń jetekshi MEDSI Premuim kompanııasynyń professory, medısına ǵylymdarynyń doktory Petr Sherbakovtyń qatysýymen gastroenterologter men endoskopıst dárigerler úshin sheberlik dárisi ótti. Sondaı-aq sheberlik saǵatynda ashy ishekti zertteýdiń «altyn standarty» sanalatyn Smart Capsule beınekapsýlalyq endoskopııanyń tusaýy kesildi.
«2014 jyldan bastap ınstıtýtta Qazaqstanda tuńǵysh ret beınekapsýlalyq endoskopııa jasalynatyndyqtan, osy biregeı zertteýdi júrgizýde tájirıbe jınaqtaldy. Beınekapsýlalyq endoskopııa – bul gastro jáne kolonoskopııanyń dástúrli ádisterine qoljetimsiz jińishke ishek aýmaǵyn kórýge múmkindik beretin kapsýlanyń kómegimen asqazan-ishek joldaryn zertteýdiń zamanaýı ádisi. Zertteýdiń ereksheligi –
ishek tolyǵymen tekseriledi. Pasıent jaısyzdyqty sezinbeıdi, zertteý júrgizý úshin narkoz jasaýdyń qajettiligi joq. Prosedýra eshqandaı aýyrtpalyqsyz ótedi. Beınekapsýla bir ret qana qoldanylatyndyqtan, pasıenttiń juqtyrý múmkindigin boldyrmaıdy. Zertteýdi ambýlatorııalyq jaǵdaıda da, sondaı-aq stasıonar jaǵdaıynda da júrgizýge bolady», dedi ınstıtýttyń basqarma tóraıymy, professor Roza Qýanyshbekova.
MEDSI Premuim klınıkasy dırektorynyń orynbasary Petr Sherbakov zamanaýı kapsýlalar jasandy ıntellekt júıesimen jabdyqtalǵanyn, keskin sapasy da aıtarlyqtaı jaqsarǵanyn atady. Sondaı-aq ol qazaqstandyq mamandar – endoskopısterdiń daıyndyǵy jaqsy ekenine de toqtaldy.
«Ár maman óz bilimin únemi jańartyp, jańa daǵdylardy ıgerip, medısına salasyndaǵy ınnovasııalar týraly habardar bolýǵa tıis. Dárigerlerimiz pasıentterdiń sapaly, der kezinde jáne bilikti medısınalyq kómek alýy úshin únemi mashyqtaryn jetildirip, sheberlik dáristerge, semınarlarǵa qatysyp, tájirıbe almasyp otyrady», deıdi Roza Tohtanálıqyzy.
Klınıkanyń endoskopııa jáne ıntervensııalyq gastroenterologııa bólimshesiniń meńgerýshisi Vladıslav Zelınskıı Smart Capsule beınekapsýlalyq endoskopııa qalaı qoldanylatynyn tómendegideı túsindirdi. Asqazan-ishek joldaryn prosedýraǵa daıyndaǵannan keıin, zertteý júrgizgen kúni pasıenttiń beline jazyp otyratyn qondyrǵy ilinedi. Pasıent ádettegi tabletka sekildi kapsýlany jutady. Kapsýla tabıǵı túrde asqazan-ishek jolymen qozǵalady, ornatylǵan kamera sýretke túsiredi, barlyq aqparat jazyp otyratyn qurylǵyǵa jiberiledi. Ádette, alynǵan jazbanyń uzaqtyǵy 14-15 saǵatty quraıdy. Endoskopıst dáriger alynǵan málimetterdi taldap, qorytyndy beredi. Kapsýla biraz ýaqyttan keıin aǵzadan ózi tabıǵı jolmen shyǵady.
«Keshe biz zertteýge kirisip kettik. Búgin máskeýlik áriptespen birge algorıtmderdiń kómegimen pasıenttiń beıne jáne foto sýretterimen jumys isteıtin bolamyz, alynǵan derekterdi zerttep, qorytyndysyn beremiz», deıdi dáriger.
Zertteýdiń osy ádisi temir jetispeýshiligi anemııasy saldarynan jińishke ishekten qan ketý, jasyryn qanǵa nájistiń oń nátıjesiniń bolýy, jińishke ishektiń qabynyp aýrýy, onyń ishinde Kron aýrýyna jáne jińishke ishek isigine kúdik týyndaǵan jaǵdaıda, tuqym qýalaıtyn polıpozdary bar pasıentterge, ishtiń túsiniksiz aýrýy men basqa da belgisiz etıologııada, jyldam salmaq joǵaltý jaǵdaıynda kórsetiletinin aıta ketken jón. Beınekapsýla ashy ishekti meılinshe muqııat zertteıdi.
Kapsýlalyq endoskopııa jińishke ishek aýrýlaryn dıagnostıkalaýdyń «altyn standarty» desek te bolady.
