Qustardyń qumǵa kómilip qalǵan ólimtikterin mektep oqýshysy uıaly telefonyna túsirip alypty. Qazirgi tańda osy oqıǵa boıynsha «Sam» memlekettik orman qorynyń ınspektorlary jedel túrde shyǵyp, anyqtaý jumystaryn júrgizip jatyr.
«Sońǵy ýaqytta Mańǵystaý oblysynyń aýmaǵynda aýa raıy shańdy daýyl, jeldi bolyp tur. Jyl qustarynyń mıgrasııasy Beıneý aýdany aýmaǵynan ótedi. Osyndaı qolaısyz aýa raıynda ishindegi álsizderi orta jolda qonyp, ári qaraı soltústik baǵytqa usha almaı ólip qalýy múmkin. Bul aýmaqta sý kózderi joq», degen Mańǵystaý oblystyq orman sharýashylyǵy jáne janýarlar dúnıesi aýmaqtyq ınspeksııasy veterınarlyq dárigerleri ólimtikterden tıisti synamalar alý jumystaryn júrgizetinin habarlaǵan bolatyn.
Mańǵystaý oblystyq orman sharýashylyǵy jáne janýarlar dúnıesi aýmaqtyq ınspeksııasy basqarmasynyń málimdeýinshe, «Ohotzooprom» О́B» RMQK-nyń Aqtóbe fılıalynyń ınspektorlary, Beıneý aýdandyq PB-niń qyzmetkeri Beıneý aýdany aýmaǵyndaǵy Sam qumy jáne oǵan irgeles jatqan aýmaqtardy qarap shyqqan. Alaıda dalada on kúnnen astam ýaqyt jatqan qustardyń ólekseleri ydyrap ketkendikten mamandar qoqıqazdardyń ólekselerine saraptama júrgize almaǵan, ıaǵnı qustardyń ólý sebebin anyqtaý múmkin bolmady. Bul týraly Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń Janýarlar dúnıesi jáne ańshylyq sharýashylyǵy basqarmasynyń basshysy Qýat Chýmakaev málim etti. Onyń paıymdaýynsha, qoqıqazdar aýa raıynyń qolaısyzdyǵynan ólgen bolýy múmkin.
– Mamandar qoqıqazdardyń ólgen jerine baryp, bes ólekse tapty. Tekserý kezinde qustarda oqtyń izderi anyqtalǵan joq. Veterınarııa salasy mamandarynyń aıtýynsha, qoqıqazdardyń qyrylýy aýa raıynyń qolaısyzdyǵyna baılanysty bolýy múmkin. Iаǵnı qustar álsiregen, jaqyn jerde sý qoımalary bolmaǵandyqtan ólgen bolýy múmkin degen boljam bar. Qazir bul ispen polısııa aınalysyp jatyr, – dep túsinikteme berdi Qýat Chýmakaev.
О́z kezeginde Mańǵystaý oblysynyń mamandandyrylǵan tabıǵat qorǵaý prokýratýrasy jaýapty memlekettik organdarǵa qoqıqazdar naqty neden ólgeni týraly mán-jaıdy anyqtaýdy tapsyrǵan. Al Ekologııa, geologııa jáne tabıǵı resýrstar mınıstrligi qoqıqazdyń sırek kezdesetin janýarlar tizimine engizilgenin, bul qusty zańsyz aýlaý jeti jylǵa bas bostandyǵynan aıyrylýy múmkin ekenin eskertti.
