Qazaqstan shahmat federasııasynyń málimetinshe, 18 jasqa deıingi jastar arasyndaǵy rapıdten álem chempıony atanǵan FIDE sheberi Qazbek Nógerbek bul joly Qazaqstan qorjynyna blıs shahmattan altyn medal salǵan.
Al blısten 18 jasqa deıingi qyzdar arasyndaǵy álem chempıonatynda 17 jastaǵy shahmatshy, áıelder arasyndaǵy halyqaralyq sheber Nazerke Nurǵalı altynnan alqa taqty.
14 jasqa deıingi uldar arasyndaǵy jarysta kúmis júlde keshe rapıdten qola júldeger atanǵan Danııal Sápenovke buıyrǵan.
«Búgin ataýly kún, qazaqstandyq shahmattyń qazynasy marapattarmen tolyqty. Kadetter arasyndaǵy jyldam jáne óte jyldam shahmattan álem birinshiliginde qazaqstandyqtar 3 altyn, 1 kúmis jáne 1 qola medal jeńip aldy. Bizdiń chempıondarymyzdy, olardyń jattyqtyrýshylaryn, ata-analaryn jáne olardyń tabysty óner kórsetýine yqpal etken barsha jandy quttyqtaımyn!», dedi qazaqstandyq shahmat federasııasynyń atqarýshy dırektory Ánýar Ismaǵambetov.
