Erbol Qarashókeev aýyl sharýashylyǵy salasyndaǵy Qazaqstan-Túrkııa qatynastarynyń turaqty damyp jatqanyn atap ótti.
Qazaqstan dándi jáne maıly daqyldardy óndirý jáne eksporttaý boıynsha jetekshi orynǵa ıe bola otyryp, búkil Ortalyq Azııa óńirinde azyq-túlik qaýipsizdigin qamtamasyz etýdegi negizgi el bolyp sanalady.
«Qazaqstan bıdaı men un eksporty boıynsha álemdik kóshbasshylardyń qataryna kiredi. Bizdiń astyq joǵary sapaly kórsetkishtermen sıpattalady. Jaıylymdary men óziniń jem-shóbiniń bolýy jáne shalǵaıdaǵy mal sharýashylyǵyna qol jetimdilik et ónimderin óndirýdiń ósýine yqpal etedi jáne halal talaptaryna sáıkes keledi. Geografııalyq ornalasýyn, baı jer resýrstaryn, sondaı-aq qolaıly klımattyq jaǵdaılardy nazarǵa ala otyryp, Qazaqstannyń agroónerkásiptik kesheni bolashaqta álemdegi azyq-túlik jaǵdaıyn turaqtandyrý men jaqsartýda mańyzdy ról atqara alady», dedi vedomstvo basshysy.
Mınıstr pandemııaǵa qaramastan qos el arasyndaǵy saýda kórsetkishteriniń turaqty óskenin jetkizdi.
2022 jylǵy qańtar-aqpanda Túrkııamen AО́K ónimderi boıynsha taýar aınalymy shamamen 37 mln dollar boldy, bul 2021 jylǵy kezeńmen salystyrǵanda 62% artyq (22,7 mln dollar). Eksport 55% artyp, 19,5 mln dollar bolsa, al ımport 69% artyp, 17,1 mln dollarǵa jetti.
Mınıstrdiń aıtýynsha, qos el arasyndaǵy saýdany damytýdyń áleýeti zor. Osyǵan baılanysty Qazaqstan et ónimderiniń, ósimdik maılarynyń jáne janýarlardan alynatyn basqa da ónimderdiń eksportyn ulǵaıtýǵa múddeli. Sondaı-aq Qazaqstanda túrik jemisteri men kókónisterine, sıtrýs jemisterine jáne taǵy basqa ónimderge suranys bar.
Kezdesý barysynda Erbol Qarashókeev Qazaqstan men Túrkııa arasyndaǵy yntymaqtastyqtyń basym baǵyttaryn usyndy. Bul aýyl sharýashylyǵy shıkizatyn qaıta óńdeý, sondaı-aq sapaly, qoljetimdi jáne básekege qabiletti azyq-túlik ónimderin óndirý.
Sondaı-aq Qazaqstan basymdyq beretin salalardyń biri – et pen sút, kartop, qant qyzylshasy, maıly daqyldar, jemister, kókónister, bylǵary shıkizatyn qaıta óńdeý salasyna sheteldik ınvestorlardy tartý dep atap ótti mınıstr.
