Qazaqstan • 15 Mamyr, 2022

Symbattyń sıqyrly kilti

119 ret kórsetildi

«Qazaqstannyń 100 jańa esimi» jobasyna usynylǵan úmitkerler jarnamalanyp jatqan kez edi. Syr óńirinen osy ataqqa laıyq dep tanylǵandar arasynda esimi kópke beımálimdeý Symbat Ábdirahmanova da júrdi.

О́mirbaıanyna úńilgende bil­genimiz, Qyzylorda qalasynda dú­nıege kelip, №12 I. Qabylov atyndaǵy orta mek­tepti bitiripti. 2005-2009 jyldar aralyǵynda Abylaı han atyndaǵy Qazaq halyqaralyq qaty­nastar men álem tilderi ýnı­ver­sıte­tinde bilim al­ǵan. Keıin osy oqý or­nynda magıs­tra­týrany aıaqtap, Iran Islam res­pýblıkasy­nyń «Tabotaboı» ýnı­versıtetinde bilimin jetildir­gen. Bizdi qyzyq­tyrǵany – aýdarmashy, psıholog Symbattyń til múkistigi bar balalar úshin mýlt­fılm daıyndaı­tyn­dyǵy. Jaraǵy jetkilikti, stýdııasy saıly ji­gitterdiń ózi elge paıdaly dúnıe ázirleý úshin memtapsyrysqa kózin satyp otyrǵanda bir úıdiń qazanyn qaınatyp, balalaryn tárbıelep, azamatynyń jaǵdaıyn jasap otyrǵan kelinshektiń mýltfılmderdi tegin ázirleıtinine qaıran qalǵanbyz. Sóıtip biz de dodaǵa qosylǵan Sym­battyń ozyp shyǵýyna tilektester qataryna qosyldyq. Sol jyly Symbat Nurtazaqyzy joba jeńim­pazy atandy.

– Bilesiz be, úzdik 100 jastyń qa­taryna qosylǵannan keıingi áýelgi kezdesýlerde kádimgideı júrek­sinetinmin. Keıin boıym úırenip, oıymdy erkin aıtatyn boldym. Negizinen bizben kezdesýge keletin jastar ǵoı. Olardyń arasynan túrli taǵdyr ıelerin kóresiń. Sondaıda meniń psıhologtyǵym jeńip ketedi. Jańaǵy zamandastaryma sál de bolsa kómekteskim kelip, izdene tústim, – deıdi Symbat.

Ádette eldiń aldynda júrgen tanymal jandardyń ómir joldary bir-birine uqsas keledi. Kópshiligi bala kezinen jatpaı-turmaı oqyp, sonyń arqasynda qalaǵan oqýyna túsip, kóp uzamaı degenine jetip jatady. Al Symbattyń soqpaǵy sál basqasha órildi.

Mektepte qarapaıym oqýshy­lardyń biri bolypty. Qurbylary sahnadaǵy ánshi, bıshilerdi túgeldep otyrǵanda Symbat ózin bolashaq ónertapqysh nemese ǵalym retinde eles­tetetin. Eshqashan jurtqa bılik aıtatyn basshy bolsam degen emes, esesine jany láz­zat alatyn is­pen aına­lys­qysy ke­letin. Mek­tep biti­retin jy­ly qa­tar­lastarynan qalys­paı, daıyndyq kýrstaryna qatysyp, UBT-dan joǵary upaı jınady. Bul Symbatqa erekshe senim syılady jáne jetistikke jetýde «Bir pa­ıyz talant, 99 paıyz eńbek» degenniń durystyǵyna kóz jetkizdi.

– О́z basym sáttilik degenge sene­min. Mysaly, «Qazaqstannyń 100 jańa esimi» jobasyna menimen qatar 96 adam usynylypty. Solardyń arasynan el tańdaýy maǵan túskeni jaýapkershilik júktedi. Mektep bitirgen jyly UBT-dan qansha joǵary upaı aldym degenmen ózim tańdaǵan mamandyqqa túse almaıtynymdy bildim. Almatyǵa jete sala kıoskiden osy «Egemen Qazaqstan» gazetin alyp qarasam, meniń upaıym­men túrik, parsy tilderine aýdarmashy mamandyǵyna grant boıynsha túsýge bolady eken. Sonymen, parsy tiline qujat tapsyrdym. Elimizde parsy tilin biletinder az bolǵandyqtan ekinshi kýrstan bas­tap elshilikte jumys istedim, – deıdi Symbat.

Oqýyn bitirip, Qyzylordaǵa oral­dy. Oblystyq oqý ortalyǵynda áleýmettik pedagogıkalyq qyzmet baǵytynda jumys isteı júrip, qıyn balalar tárbıesine aralasty. Osylaısha, psıholog mamandyǵyn ıgerdi. Jumys barysynda múmkindigi shekteýli balalarǵa arnalǵan qazaq tilindegi eńbekterdiń azdyǵyn baıqaıdy. Biraz ýaqyt ózin mazalaǵan osy máseleniń sheshimi oıda joqta tabyldy. Birde kishkentaılarynyń «Saıahatshy Dara» mýltfılmin qyzyǵa kóretinin baıqaǵan ol osyndaı dúnıe jasap kórýge bel býady. Ǵalamtorǵa qadalyp otyrǵandaǵy eńbegi esh ketpedi, tanymdyq suraq-jaýapqa negizdelgen mýltfılmdi daıyndap bolǵanda arqasynan bir aýyr júk túskendeı bolǵany este.

Damytýshy mýltónimderden bólek Bilim Foundation qoǵamdyq qorynyń demeýshiligimen Symbat «Sıqyrly kilt» anımasııalyq mýlt­fılmin ázirlep shyǵardy. Týǵan óńir tarıhy men kıeli jerlerin, sulý tabıǵaty men ǵajap tulǵalaryn nasıhattaý úshin daıyndalǵan mýlt­fılmdi ázirleý barysynda úz­dik pedagogter men tarıhshylar keńe­sine júgindi. Kóp uzamaı tapsyrys negizinde «Otpen oınama, bala­qaı» tanymdyq mýltfılmin de kish­kentaı kórermender nazaryna usyndy.

Qazir Symbat Nurtazaqyzy «Dy­bys­tardy mashyqtandyrý», «Kóńildi túster» atty damytýshy mýltfılm­der serııasynyń, «Kompıýterlik psıhodıagnostıka», «Logorıtmıka» ádistemelik quralynyń avtory retinde tanymal. «Sýısıd prevensııasy» atty joba jasaǵan ol 2016 jyly Ispanııada ótken 16-shy «Sýısıd jáne sýısıdaldy áreket» taqyrybyndaǵy Eýropalyq sımpozıýmda «Qazaqstandaǵy ká­me­­letke tolmaǵandar arasyn­da sýısıdterdiń aldyn alý: Qyzyl­or­da oblysynyń tájirıbesi» dep atalatyn baıandama jasap, álem sarapshylarynyń oń baǵasyn aldy. 2019 jyly BUU balalar qory men Dúnıejúzilik densaýlyq saqtaý uıymynyń Ońtústik Afrıkada ótken halyqaralyq sarapshylar otyrysyna qatysyp, jasóspirimder arasynda sýısıdtiń aldyn alýdaǵy tájirıbesin tanystyrdy.

– Jýyrda ǵana ómirden ótip ket­ken ákem Nurtazanyń, bizdiń amandyǵymyzdy tilep otyrǵan anam Qaldygúldiń senimin aqtaǵanyma qýanamyn. Ákem ǵumyryn bilim salasyna arnaǵan adam edi. Meniń jetistigime balasha qýanyp, baǵyt-baǵdar berip otyratyn. Aldyma maq­sat qoıyp, soǵan jetýge talpyn­ǵan maǵan jyly sózin aıtyp, jiger­len­dirgen jaqyndaryma, barsha tileýlesterime alǵys aıtamyn, – deıdi balalardy sıqyrly álemge jetelegen Symbat.

 

Qyzylorda

Sońǵy jańalyqtar

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar