Túrkistanda «Qorqyt týraly ańyz» plastıkalyq spektakli qoıylady

Túrkistan mýzykalyq drama teatrynda 21-22 mamyr kúnderi Qazaqstannyń eńbek sińirgen qaıratkeri, jazýshy-dramatýrg Ermek Amanshaevtyń  lıbrettosy boıynsha qoıylǵan «Qorqyt týraly ańyz» atty plastıkalyq spektakldiń premerasy bolady. Qoıýshy-rejısseri - belgili Reseılik baletmeıster, ónertanýshy Konstantın Semenov. Kompozıtory - daryndy jas kompozıtor Hamıt Shanǵalıev. Kórkemdik jetekshisi - Aınur Kópbasarova.

Qorqyt ata - túrki halyqtarynyń ortaq rýhanı abyzy, oıshyl, jyraý, qobyzshy. Qorqyt ata ómirde izi, artynda ádebı-mýzykalyq murasy qalǵan tarıhı tulǵa. Qazaq fılosofııasy tarıhynda Qorqyt ata - el birligin nyǵaıtqan kemeńger qaıratker, túrki dúnıetanymynyń negizin jasaǵan ǵulama oıshyl, álemdik aqyl-oı mádenıetinde ózindik orny bar fılosof-gýmanıst retinde belgili. Ári   kúıshilik, jyrshylyq ónerleriniń rýhanı atasy. Qorqyt Ata murasy IýNESKO-nyń adamzattyń materıaldyq emes mádenı murasynyń Reprezentatıvtik tizimine engizilgen.

«Qorqyt týraly ańyz» plastıkalyq spektaklinde jer dúnıeni alaı-dúleı  daýyldatyp, jaýyndatyp, jaı oınatyp, adamdardy úreıge orap dúnıe kelgen Qorqyt alyp qaraǵashtan oıyp qobyz jasaıdy. Álemdi qobyz  únimen áldılegen babamyz, kórgen túsinen shoshyp, ólimnen qashady. Jeruıyq mekendi izdeıdi. «Qaıda barsa da, Qorqyttyń kórine» kezigip, aqyry týǵan jerine - dúnıeniń kindigi sanalatyn Syr-Darııaǵa oralady.  Uly ónerin ólimge, jalpy, tirshilik daǵdarystaryna qarsy qoıyp, izgilik pen jasampazdyq nuryn shashqan Qorqyt pen jer betin úılesimsizdik pen arazdyqtyń alańyna aınaldyrýǵa tyrysqan peri qyzy - Martýdyń arasyndaǵy máńgilik aıqas zamanaýı horeografııa tilimen áserli beınelenedi.     Rýhanı tamyrlarymyzdyń altyn ózekteri qandaı? Zamana aǵymyndaǵy shynaıy óner mıssııasynyń syry nede bolmaq? Spektakl osyndaı maǵynaly suraqtarǵa jaýap izdep, kórermenge oı salady.

«Qorqyt týraly ańyz» plastıkalyq spektaklin qoıýǵa  kóptegen tájirıbeli mamandar atsalysqan. Qoıylymnyń  sahna sýretshisi – Tatıana Vıýshınskaıa, jaryq boıynsha sýretshi – Tatıana Mıshına, ol Reseıdiń «Zolotaıa maska»  ulttyq festıvaliniń  jeńimpazy,  vıdeokontent boıynsha qoıýshy sýretshi – Sergeı Rylko, birneshe iri jobalardy sátti shyǵarǵan, kostıýmder boıynsha  talantty sýretshi – Nazym Jaılybaeva jáne 2021 jyly «Jyldyń úzdik dızaıneri» júldesin jeńip alǵan dızaıner, sýretshi, stılıst – Nazym Qarpyqova, dekorator-sýretshi – Janat Kókimbekov, baletmeıster – Dáýlet Muratpekov, grım boıynsha sýretshi – Adel Nurqasymova.

«Qorqyt týraly ańyz» plastıkalyq spektaklinde  rolderde oınaıtyn kásibı balet ártisteri: Elaman  Ábdiqalyq,  Erkinbek Áýbákirov,  Aqylaı  Sydyǵalıeva, Alına Ormonbek, Rýstam Shaıhov, Gúljanat Qalamǵazına, Baqytnur Dúısenbaeva, Mao Sakaı, Farhad Sádýaqasov, Djozef  Rahımbaev, Dastan Sáttar, Aqtan Asylbashev, Ilıas  Djarlykasymov, Eldos  Ospanov, Amına Ábdiqalyq, Alýa  Tóregeldi, Kamıla  Alımjanova, Aıajan  Medethan, Madına Sadýbaeva.

«Aldaǵy ýaqytta da plastıkalyq spektaklder kórermen nazaryna usynylady. О́ıtkeni Túrkistan mýzykalyq drama teatryndaǵy balet trýppasynyń sheberligi men múmkindigi  úlken dúnıelerdi qoıýǵa qabiletti», dedi teatr dırektory ári kórkemdik jetekshisi Aınur Kópbasarova.