Aýyl sharýashylyǵy mınıstri Erbol Qarashókeevtiń jaqynda prezıdenttik delegasııa quramynda Túrkııaǵa jasaǵan sapary barysynda Qazaqstan Respýblıkasynyń Aýyl sharýashylyǵy mınıstrligi men Iskefe Holding kompanııasy arasynda ózara túsinistik týraly memorandýmǵa qol qoıyldy.
Taraptar Almaty qalasynda kompanııanyń jelatın óndirý zaýytyn salýdy ınvestısııalaý týraly kelisti. Josparlanǵan ınvestısııa kólemi 27 mln AQSh dollary. Jobany iske asyrý merzimi 2022-2023 jyl dep josparlanyp otyr. Joba aıasynda 100-den astam jańa jumys orny ashylady. Kásiporyn ındýstrııalyq aımaǵynda iske qosylady, al shıkizat retinde iri qara mal terisi paıdalanylady.
Zaýyt qurylysy bıyl bastalyp, 2023 jyly paıdalanýǵa beriledi dep boljanyp otyr, óndiris qýaty jylyna 7000 tonna jelatındi quraıdy.
Elimizde terini bastapqy óńdeý boıynsha 9 kásiporyn jumys isteıdi. Biraq óńdeýshi kásiporyndar aýyl sharýashylyǵy taýaryn óndirýshilerge IQM óńdelmegen terilerin satyp alý úshin básekege qabiletti baǵa usyna almaýda. Usaq jáne jeke qosalqy sharýashylyqtar janýarlardyń terisin qoqysqa tastaıdy, al bul óz kezeginde asa qaýipti aýrýlardyń taralý qaýpin týdyrady. 7000 tonna jelatındi óńdeý úshin shamamen 38 myń tonnaǵa jýyq shıkizat (teri) qajet.
Aıta ketý kerek, túrik holdınginiń qurylymyna terini óńdeıtin, jelatın, proteın, gıdrolızat, janýarlardan alynatyn suıyq amınqyshqyldaryn óndiretin 7 zaýyt, sondaı-aq ǵylymı-zertteý ortalyǵy men synaq zerthanalary kiredi. Búgingi kúni Iskefe Holding bylǵary salasyndaǵy ıntegrasııalanǵan iri óndirýshi, onyń úlesine Eýropa men Azııadaǵy ótkizý naryqtarymen sıyr jelatınine álemdik qajettiliktiń 6% - 3 tıesili.
