Qazaqstan • 20 Mamyr, 2022

Munaıdy Kaspıı qubyryna balama joldarmen eksporttaı alamyz - Aqsholaqov

48 ret kórsetildi

QR Energetıka mınıstri Bolat Aqsholaqov munaı tasymaly boıynsha Kaspıı qubyryna balama marshrýttardyń syıymdylyǵyn keńeıtý múmkindikteri qarastyrylyp jatqanyn habarlady, dep jazady Egemen.kz.

«Kaspıı qubyr konsorsıýmy jaıly aıtatyn bolsaq, bul negizgi eksporttyq marshrýt. Negizgi jóndeý jumystary aıaqtaldy. Sońǵy eń shetki aılaq jospar boıynsha aıdyń sońyna deıin jóndeledi. Negizinde, marshrýt shtattyq rejımde 100 paıyzǵa jumys istep tur deýge bolady. Bizde balama joldar bar. Biraq Kaspıı qubyry sııaqty úlken kólemde emes. О́ıtkeni jylyna 54 mıllıon tonna munaıdy tasymaldaıtyn balama joldy bir túnde tabý múmkin emes», dedi vedomstvo basshysy elorda turǵyndarymen kezdesýi kezinde.

Onyń aıtýynsha, mundaı kólemdi ornalastyrý úshin kem degende úsh jyl qajet.

«Tipti Qytaıǵa jetizetin balama joldyń qýaty 20 mln tonna ǵana. Múmkindikti keńeıtemiz degen kúnniń ózinde Qytaı sonsha kólemde munaı alýǵa daıyn ba degen másele bar. Ol marshrýt boıynsha jalǵyz tutynýshy ǵana bar – Qytaı. Olardan basqa eshkim tutyna almaıdy. Baký marshrýtyn balama retinde qalyptastyrý ınfraqurylym turǵysynan óte uzaq. Áýeli portty qalpyna keltirip, keıin kólemin ulǵaıta bastaý kerek bolady. Ekinshi quryq portyn ornatyp, munaı qubyryn tartý kerek. Tankerler tabý qajet. Kaspıdiń tabany taıaz bolǵandyqtan onda kez kelgen tanker júze almaıdy. Tek 12 myń tonnalyq tankerler ǵana júze alady», dedi Bolat Aqsholaqov.

Ol Baký tarapy Qazaqstan tasymaldaıtyn kólemdegi munaıdy qabyldaýǵa daıyn bolmaýy múmkin ekenin qosa aıtty.

«Osynyń bárin eskersek bul másele óte kúrdeli. Biraq biz balama nusqalardy qoldanamyz. Búginde munaıdyń bir bóligin osy balama joldarǵa jóneltip jatyrmyz. Bul 16,5 mln tonnadaı bolady. Árıne, ol 54 mln tonna emes. Biz basqa baǵyttar boıynsha júk tasymaldaımyz. Sondyqtan bul máseleni túbegeıli sheshpeıdi. Biraq biz basqa da tásilderin qarap jatyrmyz», dedi mınıstr.

Sharadan keıin BAQ ókilderiniń saýalyna bergen jaýabynda Kaspıı qubyryna balama jol tóseýdiń múmkindigi týraly túsinikteme berdi. Aıtýynsha, Baký baǵyty birneshe jyldyń ishinde ınfraqurylym tóseýge bolady. Biraq ony rezervte ustap turýdyń shyǵyny orasan kóp bolýy múmkin.

«Qubyrǵa qyzmet etý shyǵyndary bolady. Mysaly qubyr tósep, basqa eldiń aýmaǵyna port salyndy deıik. Ol portty jaldaý aqysyn munaı tasymaldasaq ta, tasymaldamasaq ta tódeý kerek bolady. Osyndaı túrli shyǵyndar bar. Qazir sonyń bárin zerdelep jatyrmyz», dedi vedomstvo basshysy.

Sońǵy jańalyqtar

TúrkPA-nyń ataýy ózgeredi

Parlament • Keshe

Almaty joldaryn sý basty

Aımaqtar • Keshe

Álemde altyn arzandady

Álem • Keshe

Uqsas jańalyqtar