Bıyl Mańǵystaý oblysynda 7002 jas túlek mektep bitirip, sońǵy qońyraý 142 jalpy bilim berý uıymdarynda ótkizildi.
Jas túlekter avtokóliktermen sherýler uıymdastyryp, jol-qozǵalysy erejelerin buzǵany jóninde áleýmettik jelilerge ár túrli sıpattaǵy beınerolıkter jarııalady. Quqyqbuzýshylyq jasaǵan avtokólik júrgizýshileri anyqtalyp, jol qozǵalysy erejelerin buzǵandary úshin 89 adamǵa qatysty barlyǵy 119 ákimshilik is qujattary jınaqtalyp, onyń ishinde 35 avtokólik arnaıy aıypturaqtarǵa jabyldy.
Túlekter jasaǵan quqyqbuzýshylyqtardyń basym kópshiligi kólik terezesinen basyn shyǵaryp, óz ómirine qaýip tóndirý deregi boldy. Bul úshin QR ÁQBtK-niń 593-baby 2-bóligimen barlyǵy 55 ákimshilik hattama jasaqtaldy. Sondaı-aq kólik quraldarynyń paıdalaný qaǵıdalaryn buzǵan 17 júrgizýshi anyqtalyp, olarǵa qatysty ÁQBtK-niń 590-babynyń ár túrli bólikteri boıynsha jaýapkershilikke tartyldy. Kólikti qujatsyz basqarǵan nemese múlde júrgizýshi kýálikteri joq 16 júrgizýshige QR ÁQBtK-niń 612-baby boıynsha hattama toltyrylsa, bes júrgizýshiniń kólikti basqara otyryp, saqtandyrý polısine tirkelmegeni anyqtaldy.
Polısııa tarapynan san túrli eskertýlerdiń bolýyna qaramastan, jas túlekter quqyqbuzýshylyqtardy sanaly túrde jasap, jol qozǵalysy erejelerin óreskel buzdy. Osyǵan oraı tártip saqshylarynyń tarapynan da barlyq tıisti sharasy qabyldanyp, zań aıasynda barlyq júrgizýshiler jaýapqa tartyldy.
