BAQ taratqan fotosýretterden beton edender men temir jabdyqtardyń kóshege qaraı qulap, birneshe kólikti qıratqanyn kórýge bolady. Qazir izdestirý-qutqarý jumystary jalǵasyp, qıraý sebepteri anyqtalýda. Oqıǵaǵa kináli degen kúdikpen 10 adam qamaýǵa alyndy, olardyń arasynda qurylys júrgizgen merdiger mekeme basshysy, qalanyń qazirgi jáne burynǵy eki basshysy bar.
Ashýlanǵan halyq ótken aptanyń aıaǵynda Abadan kóshelerine shyǵyp, narazylyq bildirdi. Olar «biliksiz sheneýnikterge ólim jazasy qajet» dep aıqaılap, qoldaryna plakat ustap shyqty. Irannyń Fars aqparat agenttiginiń habarlaýynsha, narazylyq aksııasyna shyqqandardyń sany 100-ge jýyq. Al Irna memlekettik aqparat agenttigi ǵımarattyń Abadandaǵy saýda-sattyq ortalyǵynda ornalasqanyn jáne onyń tómengi qabattary birneshe kúnnen beri ashyq ekenin, al joǵarǵy qabattarda qurylys jumystary júrgizilip jatqanyn habarlady. Kýágerlerdiń aıtýynsha, ǵımarat jergilikti ýaqyt boıynsha 12.40 (GMT 08:10) shamasynda kenetten opyrylyp túsken. «Alǵashynda men bul jer silkinisi dep oıladym», dedi dúken ıesi Ahmad Associated Press agenttigine bergen suhbatynda. Irannyń Qyzyl Jarty Aı uıymy oqıǵa ornyna Abadan men kórshiles qalalardan 23 qutqarý toby men onnan astam jedel járdem kóligi jetkenin málimdedi. Sonymen qatar Irannyń Mehr aqparat agenttiginiń habarlaýynsha, qamalǵandardyń kópshiligi ǵımarattyń qurastyrylǵan bólikteriniń birinshi qabatynda saýda jasaýǵa ruqsat bergender eken.
Osy oqıǵadan keıin eldegi qurylys qaýipsizdigi standarttaryna qatysty máseleler qaıta talqyǵa salyndy. Qalanyń joǵary laýazymdy sheneýnigi Mohammad Mohber memlekettik telearnaǵa bergen suhbatynda ǵımarattyń qurylysy kezinde sybaılas jemqorlyqqa jol berilgenin aıtady. «Jergilikti bılik ókilderiniń aıtýynsha, zań boıynsha ǵımarat tek alty qabattan turýy kerek edi, biraq qurylys barysynda taǵy tórt qabat qosylǵan», dep habarlaıdy Associated Press.
О́tken ǵasyrdyń 80-jyldaryndaǵy Iran-Irak soǵysy kezinde atalǵan aımaq jappaı qıratylyp, ony qalpyna keltirý jobalarynyń kópshiligi nashar qurylys tájirıbesi úshin synǵa ilikken bolatyn. «Biraq synnan nátıje shyǵarǵan bılik te, qurylys mekemeleri de joq. Bul ǵımarattyń qıraýy Irandaǵy sońǵy jyldardaǵy eń aýyr oqıǵa boldy», deıdi sarapshylar. Eske salsaq, 2017 jyly Tegerandaǵy 17 qabatty Plasco ǵımaraty órtenip, keıin opyrylyp qulap, apat saldarynan 20 adam, onyń ishinde 16 órt sóndirýshi qaza tapqan edi.
«Al Senegaldyń batysyndaǵy Tıvaýan qalasyndaǵy aýrýhanada órt shyǵyp, 11 jańa týǵan náreste tilsiz jaýdyń ortasynda qalyp qoıǵan bolatyn», dep habarlady el prezıdenti Makı Sall. Bul oqıǵa Mame Abdou Aziz Sy Dabakh aýrýhanasynda bolǵan. Senegal saıasatkeri Dıop Sıdiń aıtýynsha, órt qysqa tuıyqtalý saldarynan bolǵan. Qala meri Demba Dıop úsh sábıdiń aman qalǵanyn aıtty. Jergilikti aqparat quraldarynyń habarlaýynsha, aýrýhana jaqynda ǵana ashylǵan. «О́te ókinishti jáne aýyr jaǵdaı. Oqıǵanyń mán-jaıyn anyqtaý úshin tergeý júrip jatyr», dedi oqıǵa kezinde Dúnıejúzilik densaýlyq saqtaý uıymynyń ókilderimen kezdesý úshin Jenevada bolǵan Densaýlyq saqtaý mınıstri Abdýlaı Dıýf Sarr.
«О́rt Senegaldaǵy densaýlyq saqtaý mekemelerinde bolǵan birneshe oqıǵadan keıin taǵy qaıtalanyp tur, munda densaýlyq saqtaý salasynda qala men aýyl arasynda úlken aıyrmashylyq bar», deıdi sarapshylar. Máselen, Lınger óńirinde osy jyldyń sáýir aıynda aýrýhanada órt shyǵyp, tórt jańa týǵan náresteni aman alyp qalý múmkin bolmaǵan edi. Qala basshysy bolsa órt elektr jabdyqtarynyń isten shyǵýyna sebepshi bolǵan perzenthanadaǵy kondısıonerden shyqty dep málimdegen bolatyn. Al sarapshylar bolsa elde sońǵy kezderi salynyp jatqan jańa ǵımarattardyń sapasy múlde syn kótermeıtinin aıtady. Ásirese órtti lezde taratyp, qyzyl jalynǵa beıim qurylys materıaldarynan kóptegen qoǵamdyq ǵımarattardyń, onyń ishinde úıler men emhanalardyń boı kóterip jatqanyn aıtyp, dabyl qaǵýda.
