BǴM málimetinshe, búgingi tańda 2 mıllıonǵa jýyq bala osy múmkindikti paıdalanyp bilimin shyńdap jatyr. Munda oqýshylar bilim kókjıekterin keńeıtip qana qoımaı, ishki jan dúnıelerin rýhanı baıytady. Olardyń barlyǵy ýaqytty tıimdi ótkizip, yńǵaıly keste men qyzyqty formatta oqıdy.
Aıta ketsek, jazǵy mektepter emtıhan tapsyratyn 9-11 synyp oqýshylarynan basqa, barlyq shákirtter úshin uıymdastyrylady.
«Jazǵy mekteptegi sabaqtar synyptaǵy oqýshylar sanyna qaramastan ótedi. Ár oqýshy bilimindegi olqylyqtardyń ornyn toltyrýǵa múmkindik alady. Oqý yńǵaıly keste boıynsha qyzyqty formatta ótedi. Mysaly, sabaqtar mýzeılerde, taza aýada ótkizilip, ártúrli ekskýrsııalar uıymdastyrylady. Jazda balalar ýaqytyn telefon oıyndaryn oınap ótkizetinin bilemiz. Árıne, eger múmkindik berilse, ata-analar balalarǵa ýaqytty kitap oqýǵa nemese bilim alýǵa jumsaǵany durys ekenin túsindergeni abzal. Balalardyń jazǵy mekteptegi oqýǵa qyzyǵýshylyǵyn, yntasyn arttyrý úshin muǵalimder baǵa qoıyp, úı tapsyrmasyn bermeıdi. Al mektep ákimshiligi men ustazdary jazda oqý barynsha qyzyqty ári tanymdy ótýi úshin barlyq jaǵdaıdy jasaýy kerek. Qazirdiń ózinde ata-analar jaqsy pikirlerin aıtyp jatyr», dedi QR BǴM Mektepke deıingi jáne orta bilim komıtetiniń tóraıymy Gúlmıra Kárimova.
Saltanat Kenjebaı
