«Sońǵy jyldary joǵary tehnologııalardyń damýyna baılanysty ınternet-alaıaqtyq faktileriniń sany aıtarlyqtaı ósken. Jyl basynan beri 5 aıda elorda aýmaǵynda 1390 ınternet-alaıaqtyq faktisi tirkeldi. Al ótken jyldyń 5 aıynda 1730 jaǵdaı tirkelgen edi. Internet-alaıaqtyqtan kelgen jalpy materıaldyq shyǵyn 1 mlrd 150 mln teńgeden asty», dedi Talǵat Bólegenov qalalyq polısııa departamentinde ótken brıfıngte.
Polısııanyń málimetinshe, atalǵan kezeńde 48 ınternet-alaıaq ustalyp, qylmystyq jaýapkershilikke tartylǵan.
«Jábirlenýshilerge shamamen 135 mln teńge shyǵyn óteldi. Ustalǵan 48 adamnyń 25-i eki jáne odan da kóp epızod jasaǵan. Kúdiktiler – negizinen 20-35 jas aralyǵyndaǵy adamdar», dedi bólim bastyǵy.
Mysaly, olardyń biri ınternet jelisinde 60-tan astam alaıaqtyq jasaǵan.
«Bıyl kámeletke tolmaǵan bir adam ınternet-alaıaqtyq jasaǵany úshin jaýapqa tartyldy. Ol shamamen 25 adamdy aldaǵan jáne jedel-tergeý is-sharalary barysynda ustaldy. Onyń ózi basqa qalada bolsa da, elordadaǵy páterlerdi jalǵa berý týraly habarlandyrýlar jarııalap otyrǵan. Saldarynan kúdikti ózgelerge 350 myń teńge shyǵyn keltirgen», dedi T. Bólegenov.
Aıana Toǵanbek
