Is-shara moderatory, ýnıversıtet prorektory, fılologııa ǵylymdarynyń doktory, professor, Saıası qýǵyn-súrgin qurbandaryn tolyq aqtaý jónindegi memlekettik komıssııanyń múshesi Dıhan Qamzabekuly kirispe sózinde elimizde búgingi kúni tarıhı jadyny saqtaýǵa erekshe kóńil bólinetindigin atap ótti. Al Qazaqstan halqy Assambleıasy Tóraǵasynyń orynbasary-Prezıdent Ákimshiligi QHA hatshylyǵynyń meńgerýshisi Marat Ázilhanov tarıhtaǵy aqtańdaq betterge Assambleıa ókilderiniń qosyp jatqan úlesi týraly aıtty.
Zertteýshiler, ǵalymdar bas qosqan kezdesýde qazirgi tańda tarıhshylardyń qolynda saıası qýǵyn-súrgin qurbandary týraly qundy derekter bar ekeni aıtyldy. Máselen, ýnıversıtet professory, tarıh ǵylymdarynyń doktory Araılym Musaǵalıeva Soltústik Qazaqstanǵa jer aýdarylǵandar týraly baıandady.
Repressııaǵa aldymen baı-shonjarlardyń ushyraǵany tarıhtan belgili. Osy oraıda «KSRO-nyń sharýalarǵa qarsy repressııa saıasatynyń quqyqtyq negizderi týraly» Memleket tarıhy ınstıtýtynyń dırektory, tarıh ǵylymdarynyń doktory, professor Erkin Ábildiń zerdeleý jumysy baılardyń qýǵyn-súrginge ushyraýy taqyrybyndaǵy derekter qataryna qosyldy.
Ýnıversıtettiń «El tarıhy» ǵylymı-zertteý ortalyǵynyń dırektory, tarıh ǵylymdarynyń kandıdaty Erlan Saılaýbaı kóterilisshiler qozǵalysyna qatysty qujattardy qarastyrý máselesine toqtaldy. Ol asharshylyq taqyrybyna arnalǵan kóp tomdyq kitaptarǵa saraptama jasaǵan. Jınalǵandarǵa B.Ábdiǵalıulynyń Qazaqstannyń aýyl sharýashylyǵyn keńestik jańǵyrtý kezeńindegi qujattar jınaqtalǵan «Asharshylyq» dep atalatyn eńbegi tanystyryldy. «Jınaqtaǵy derekkózder qazaq aýyldaryn kúshtep ujymdastyrýǵa baılanysty qaıǵyly oqıǵalardy, baılar men kýlaktardy tap retinde tárkileý jáne joıý saıasatyn ashyp kórsetedi.
Sondaı-aq saıası qýǵyn-súrgin qurbandaryn aqtaý jónindegi memlekettik komıssııanyń aldyn ala jumysynyń birqatar nátıjesi jarııalansa, basqosý Saıası qýǵyn-súrgin qurbandaryn tolyq aqtaý jónindegi memlekettik komıssııa músheleriniń «Saıası qýǵyn-súrgin aýqymyn zertteý krıterııleri: otandyq jáne sheteldik tájirıbe» jınaǵynyń tusaýkeserimen aıaqtaldy.
