Is-shara jumysyn kitaphana dırektory, saıası ǵylymdar kandıdaty Baqytjan Temirbolat júrgizdi. Ol óz sózinde memlekettik sımvoldarǵa baılanysty pikirin eldiń saıası rámizderi jastardyń ózin-ózi tanýynyń mańyzdy faktorlary retinde jetkizdi. Sonymen qatar Aqparat jáne qoǵamdyq damý vıse-mınıstri Aleksandr Danılov el jastarynyń áleýmettik portreti týraly sóz qozǵady. Al memlekettik Eltańbanyń avtory, Qazaqstannyń eńbek sińirgen qaıratkeri Jandarbek Málibekov ulttyq rámizderimizdi nasıhattaý jumystaryna kóńili tolmaıtynyn jetkizdi.
«Barlyǵy naýqan esebinde ǵana, rámizder kúnine oraı jylyna bir apta, on kúndeı ǵana kezdesýler, ózge de is-sharalar ótkizemiz de qoıamyz. Al olardyń máni men maǵynasyn, qundylyǵyn balabaqsha, mektep, joǵary oqý oryndarynda, aýyl jastarynyń boıyna sińdirýimiz qajet. Jastar Týdy qoldaryna alǵanda, úıleriniń tórine ilgende ǵana júregimen sezinedi. Meniń Otanym, meniń Otbasym, meniń Qazaqstanym, meniń Baıraǵym, meniń Tańbam, meniń Elim degen túsinik qalyptasady. Jańa Qazaqstan quramyz dep jatyrmyz, olaı bolsa osy jastar uıymdary bar, komıteti bar solardyń janynan rámizderimizdi nasıhattaý úshin zańda qandaı ózgerister, talaptar qajet ekenin anyqtaıtyn komıssııa qurylsa degen usynysym bar. Bir konferensııamen ǵana másele sheshilmeıdi», dep pikiri men usynysyn bildirdi Jandarbek Málibekov.
L.N.Gýmılev atyndaǵy Eýrazııa ulttyq ýnıversıtetiniń prorektory, fılologııa ǵylymdarynyń doktory, professor Dıhan Qamzabekuly da rámiztanýdaǵy jastardyń róline anyǵyraq aıtsaq, jańa mindetterine toqtaldy.
Konferensııaǵa sheteldik sarapshylar onlaın baılanys arqyly qatysty. Qyrǵyz memlekettik zań akademııasynyń kafedra meńgerýshisi, fılosofııa ǵylymdarynyń doktory Savetbek Abdrasýlov memlekettik rámizderdiń ıdeologııalyq, saıası kemshilikterin óz eliniń mysalynda baıandady. «Tý týraly aıtatyn bolsaq, qyrǵyzdar erte zamannan aq, kók, qyzyl jáne qara tústi týdy qoldanǵan. Olardyń árqaısysy halyqtyń belgili bir kúıin bildirdi. Qyrǵyz halqy joqtaýdy qaramen, sulýlyq, ómir men erlikti qyzylmen, aspan, aqıqat, tektilikti kókpen, ádildik, kelisim, tatýlyq, birlik, rýhanı tazalyqty aqpen belgilegen. Tý negizi aq jáne ashyq kók tústi bolý kerek. Al burynǵy Qyrǵyzstannyń týynda qara tús qoldanyldy. Bul jobany qurarda kásibı mamandardyń tartylmaǵanyn kórsetedi. Ideologııa, saıasat turǵysynan alǵanda neni kórsetedi? Qara tús – qaraly kún, aza tutýdy meńzeıdi. Múmkin, qyrǵyz halqynyń aýmaly-tókpeli kezeńderdi bastan ótkergenin kórsetkisi kelgen bolar. Týdyń túsi aq, kók jáne altynnyń úılesimi bolýy kerek. Kógildir-kók tústi tý, onyń ortasynda aq óńi bar altyn sheńber jáne ishinde sýreti bar. Osy turǵyda Týdy qurastyrarda qazaq halqy durys sheshim qabyldaǵan. Erkindikti bir týǵa syıǵyzǵan. Osy jaǵynan eldiń saıası áleýetin kórýge bolady», dedi qyrǵyz ǵalymy. Al Djordj Marshall atyndaǵy Eýropalyq qaýipsizdik máselelerin zertteý jónindegi ortalyqtyń professory, saıası ǵylymdar doktory (Nıý-Meksıko, AQSh) Gregorı Glıson Qazaqstannyń memlekettik rámizderin jáne jalpy qazaq elin shetel azamatynyń kózimen sıpattap berdi.
Konferensııa óskeleń urpaqtyń memlekettik rámizderge, elimizdiń patrıottyq mazmundaǵy brendterine qurmetpen qaraýyn, olardyń jasampazdyq qundylyqtaryn nyǵaıtýdy maqsat etken edi. Sarapshylar is-shara joǵary deńgeıde ótkenin jetkizip, maqsatyna jetý keler kúnniń enshisinde ekenin aıtty. Ǵylymı konferensııanyń qorytyndysy boıynsha memlekettik rámizderimizdi memleket ishinde jáne shekaradan tys júrgen jastardyń arasynda nasıhattaý boıynsha usynystar ázirlendi.
