Festıvalde ártúrli mýzykalyq baǵyttar: hıp-hop, pop jáne ındı shyrqalady. Mundaı stıldegi mýzykany súıetin jastar kýmırin syrttan izdemeıdi. Olardyń tańdaýy – qazaqstandyq talanttar, otandyq mýzykanttar. Sebebi búgingi jas ánshiler týraly qoǵamda qaıshylyqty kózqaras bolǵanymen, jańa tolqynnyń án mátininde tazalyq, ádildik, adaldyq bar. Olar ashyq. Shyǵarmashylyǵy shyndyqqa tunyp tur. Qoǵamnyń kemshiligin, keleńsizdikti, unamsyz qyryn ashyq mátinmen aıta alady. Jany jalǵandyqqa bylǵana qoımaǵan jastardyń olardyń ánderine elitip, essiz tabynatyn sebebi de sol. Al jastardyń júregin búginde kimder baýrap alyp otyr?
((beu fest)) alańy qazirgi zamannyń eń úzdik jáne erekshe ártisterin jınady: Ninety One, The Limba, Yenlik, Moldanazar, 104, Ulukmanapo, Raim, Darkhan Juzz, Taspay, jeltoksan, Hey Monro, Kalifarniya, Alpha, Marhaba Sabi, ARO, abdr., JETI, Qonyratbay Fam, dudeontheguitar, Ato Woody, Rauana.
Ras, bul oryndaýshylar men shyǵarmashylyq toptardyń ánderin jastar qabyldaǵanymen, qoǵam tarapynan, jıi synǵa ushyraıdy. Kórkemdik sapasy ótken ýaqyttyń bıik deńgeıimen úılesim taba almasa da, bastysy, bul oryndaýshylar Otandy súıýdi dáripteıdi. Festıval qarsańynda ótken baspasóz máslıhatynda: «((veu fest)) Almatyda ótkizýdiń ózindik máni bar. Festıvalde óner kórsetetin mýzykanttar osynda, otanynda tanymal boldy. Bizdiń talanttardy syrttaǵy jetistikterden keıin emes, elde taný mańyzdy. Sonymen qatar Almaty – talǵam men trend qalyptasatyn megapolıs. О́nerdiń barlyq túrindegi jańa baǵytty, ásirese jastar mýzykasyndaǵy sońǵy sándi stıldi qashannan Almaty belgileıdi. Ártisterimizdiń shyǵarmashylyǵyn súıý jáne qurmetteý – keremet! Osy oraıda festıvaldiń mýzykalyq seriktestigi týraly aıta ketkim keledi. Ol Aitu Mýzyka jańa strımıngtik qyzmeti bar Aitu sýperqosymshasy», deıdi bas prodıýser Jannur Aıdarbekova.
Búgingi jastar súıip tyńdaıtyn úzdik ánderdi taratyp otyrǵan shyǵarmashylyq toptar men jekelegen ánshiler baǵytynyń bólek bolǵanyna qaramastan bir alańda kezdesýge birden kelisim bergen. Bul alańda óz tyńdaýshylaryn qalyptastyrǵan tanymal toptar da, onlaın alańda 3-4 mln qaralym jınaıtyn esimi endi tanylǵan jas ánshiler de bar. Sondaı-aq eń tanymal 22 ónerli top qatysatyn festıvalde qazaqstandyqtarǵa esimi jaqsy tanys Qyrǵyzstan men О́zbekstan oryndaýshylary da óner kórsetedi.
2015 jyldan beri qazaq tilindegi mýzykany damytý ıdeıasyn alǵa tartyp kele jatqan Zaq esimimen tanymal Ninety One tobynyń múshesi Dýlat Muhametqalıev festıvaldiń ashylýyn asyǵa kútedi. «Ideıa bizge birden unady. Biz jergilikti Made in KZ mýzykasyn qoldaý bastalatyn ýaqytty kópten kúttik. Qazaqstandyq mýzyka ındýstrııasy qarqyndy damyp keledi. Biz osyndaı aıtýly oqıǵanyń bir bóligi bolýǵa qýanyshtymyz», deıdi Zaq.
Árbir ártistiń stıli men hıtteri belgili, olar árbir ekinshi qazaqstandyqqa, sondaı-aq TMD-dan tys jerge de tanymal. Festıvaldiń kreatıvti prodıýseri jáne õzen mýzykalyq leıbliniń negizin qalaýshy Aızat Qusaıynov. «((beu fest)) otandyq mýzyka sahnasynyń búgingi ahýalyn kórsetýge arnalǵan. Kishkentaı klýbtar men tar sheńberdegi tanymaldylyqtan bastap stadıondarda óner kórsetýge jáne álemdik hıtterge deıin bizdiń ártisterimizdiń júrip ótken úlken jolyn kórsetedi. Sondaı-aq festıval birneshe janrlar men elderdiń ókilderin biriktire otyryp, qazaq mádenıetiniń kópqyrlylyǵy men izgi nıetin kórsetedi», deıdi Aızat Qusaıynov.
Sapaly dybys, joǵary tehnıkalyq draıv, kásibı qoıylǵan jaryqpen ótetin mýzykalyq shoý jappaı án aıtýǵa shaqyratyn aýqymdy karaokege de ulaspaq. Festıvalde dybysqa, mýzykaǵa kóbirek mán berilip otyrǵandyqtan, uıymdastyrýshylar basqalarǵa úlgi etý maqsatymen óner kórsetetin jastardy jandy daýysta án aıtýǵa shaqyryp otyr.
Úsh jylǵa jýyq kúrdeli kezeńdi bastan ótkergen Almaty halqyna kóńildi demalys uıymdastyryp, onyń ahýalyn jańa mýzyka lebimen jaqsarta túsýdi murat tutqan festıval osy ýaqyt aralyǵynda mýzyka áleminde paıda bolǵan barlyq jańalyqty: jarqyraǵan jańa esimder, jazylǵan jańa ánder, jańa baǵytty kópshilikke bir mezgilde tanystyrýdy kózdeıdi. Osy ereksheligin basa aıtqan festıvaldiń rejısseri Aıgúl Aqsambıeva jańa joba bolǵandyqtan aýqymdy sharaǵa burynǵy festıvalderdiń eski talabymen qaraı almaıtyndaryn aıtty. Bastysy, ártis pen onyń kórermeni arasynda eshqandaı kederginiń bolmaýy kózdelip otyr. Sebebi oryndalatyn ár ánniń óz fılosofııasy, arqalaıtyn júgi bar. Sondyqtan baǵdarlama burynnan tanys standarttan aýytqıdy. Tek mýzyka men sapaly dybys – zamanaýı ártister jaqsy kóretin shyǵarmashylyq mınımalızge baǵyndyrylmaq. Sapaly akýstıkasymen belgili, 7000 kórermendi qamtıtyn «Suńqar» shańǵy tramplınderi kesheninde ótetin festıvaldiń bılet quny – 7000-10000 teńge aralyǵynda.
Qazaqstannyń mýzyka áleminde jańa, jas, erkin baǵyttyń ekpin alyp, qanat jaıýyna qoldaý bildirgen uıymdastyrýshylar sony pishindegi festıvaldi jyl saıyn ótkizýdi josparlap otyr.
ALMATY
